Uimhir 14.

ACHT UM THUARASTAL AGUS THEAGHLACHAS AN tSEANASCAIL, 1923.

DE BHRÍ go bhfuil beartuithe ag Dáil Éireann le rún agus go bhfuil forálta aca le hAirtiogal 60 de Bhun-reacht Shaorstáit Éireann go mbeidh tuarastal Seanascail Shaorstáit Éireann ar có-mhéid leis an dtuarastal a bhí iníoctha le Seanascal na hAstráile le linn don Bhun-reacht roimh-ráite do theacht i bhfeidhm agus go gcuirfear de mhuirear é ar chiste phuiblí Shaorstáit Éireann:

AGUS DE BHRÍ go bhfuil beartuithe le rún ag Dáil Éireann, leis, agus go bhfuil forálta aca le hAirtiogal 60 san go ndéanfar soláthar oiriúnach as an gciste puiblí roimh-ráite chun tigh comhnuithe agus teaghlachas oifigiúil Sheanascail Shaorstáit Éireann do choinneáil suas:

AGUS DE BHRÍ go bhfuil sé oiriúnach socrú speisialta do dhéanamh chun go n-íocfaí as an gciste puiblí roimh-ráite do réir Airtiogail 60 sin, tuarastal Seanascail Shaorstáit Éireann agus costas a thigh comhnuithe agus a theaghlachas oifigiúil do choinneáil suas:

AGUS DE BHRÍ gurb é méid an tuarastail a bhí iníoctha le Seanascal na hAstráile le linn do Bhun-reacht Shaorstáit Éireann teacht i bhfeidhm ná £10,000 sa mbliain:

ACHTUIGHEADH OIREACHTAS SHAORSTÁIT ÉIREANN AR AN ÁBHAR SAN MAR LEANAS:—

1. —Déanfar ón séú lá de mhí na Nodlag, 1922, suim dheich míle púnt sa mbliain do chur mar mhuirear ar Phrímh-Chiste Shaorstáit Éireann no a thora fáis agus d'íoc as in íocaíochtanna co-ionannacha ráithiúla mar thuarastal don té a bheidh ina Sheanascal de Shaorstát Éireann de thuras na huaire faid a bheidh gach Seanascal den tsórt san i seilbh na hoifige sin.

2. —Íocfaidh an t-Aire Airgid as airgead a sholáthróidh an t-Oireachtas pé suim bhliantúil no suim eile no pé suimeanna bliantúla no suimeanna eile a chinnfidh an t-Aire Airgid ó am go ham a bheith 'na soláthar oiriúnach chun tigh comhnuithe agus teaghlachas oifigiúil Sheanascail Shaorstáit Éireann do choinneáil suas ón 6adh lá de Mhí na Nodlag, 1922.

3. —Féadfar an t-Acht um Thuarastal agus Theaghlachas an tSeanascail, 1923 , do ghairm den Acht so.