Uimhir 18 de 1973

ACHT TEAGHLACHAS AN UACHTARÁIN (LEASÚ), 1973

[An tiontú oifigiúil]

ACHT DO LEASÚ ACHTA THEAGHLACHAS AN UACHTARÁIN, 1938 AGUS 1947. [1 Lúnasa, 1973]

ACHTAÍTEAR AG AN OIREACHTAS MAR A LEANAS:

1. —San Acht seo ciallaíonn “an Príomh-Acht” Acht Teaghlachas an Uachtaráin, 1938 .

2. —Leasaítear leis seo alt 1 den Phríomh-Acht tríd an bhfo-alt seo a leanas a chur in ionad fho-alt (1) (a cuireadh isteach le hAcht Teaghlachas an Uachtaráin (Leasú), 1947 ):

“(1) Is iad na sochair agus na liúntais a gheobhaidh an tUachtarán de bhun alt 11 d'Airteagal 12 den Bhunreacht—

(a) suim de réir ráta £15,000 sa bhliain, agus

(b) suim arb ionann aon tráth a ráta bliantúil agus ráta bliantúil luach saothair an Phríomh-Bhreithimh an tráth sin arna mhéadú deich faoin gcéad,

agus is é luach saothair pearsanta an Uachtaráin an tsuim sin is déanaí a luaitear.”.

3. —Leasaítear leis seo alt 3 den Phríomh-Acht tríd an bhfo-alt seo a leanas a chur in ionad fho-alt (1):

“(1) Deonóidh an Rialtas pinsean do gach duine a scoirfidh, tar éis é bheith i seilbh oifig an Uachtaráin, de bheith i seilbh na hoifige sin ar chúis ar bith seachas bás nó a chur as oifig faoi alt 10 d'Airteagal 12 den Bhunreacht, agus is é a bheidh i ráta bliantúil an phinsin aon tráth leath ráta bhliantúil luach saothair pearsanta an Uachtaráin an tráth sin.”.

4. —Leasaítear leis seo alt 4 den Phríomh-Acht tríd an bhfo-alt seo a leanas a chur in ionad fho-alt (1):

“(1) Faoi réir forálacha an ailt seo, deonóidh an Rialtas pinsean do bhaintreach aon duine—

(a) a d'éag agus é i seilbh oifig an Uachtaráin, nó

(b) a d'éag agus é ag fáil pinsin a deonaíodh faoi alt 3 den Acht seo, nó

(c) a bhí, díreach roimh a bhás, i dteideal go ndeonófaí pinsean faoin alt sin dó ach nár deonaíodh amhlaidh dó é,

agus is é a bheidh i ráta bliantúil an phinsin aon tráth an ceathrú cuid de ráta bliantúil luach saothair pearsanta an Uachtaráin an tráth sin.”.

5. —(1) Féadfar Acht Teaghlachas an Uachtaráin (Leasú), 1973 , a ghairm den Acht seo.

(2) Féadfar Achtanna Teaghlachas an Uachtaráin, 1938 go 1973, a ghairm d'Achta Theaghlachas an Uachtaráin, 1938 agus 1947, agus den Acht seo le chéile.