An Chéad Lch. Lch. Roimhe Seo (AN CHÉAD SCEIDEAL Na Coinníollacha dá dTagraítear in Alt 5 (1) (b))

24 1980

AN tACHT UM CHINEÁLACHA PLANDAÍ (CEARTA DÍLSEÁNAIGH), 1980

AN DARA SCEIDEAL

Iarratais agus Achomhairc

Alt 15 (2).

Na forálacha dá dtagraítear in alt 15 (2).

1. I gcás ina ndéanfar iarratas faoi alt 4, 10, 11, 17, 21 nó 22 den Acht seo chun an Rialaitheora, féadfaidh an Rialaitheoir, más oiriúnach leis, a cheangal ar an iarratasóir fógra a fhoilsiú i cibé slí a ordóidh an Rialaitheoir á rá go ndearnadh an t-iarratas agus á chur in iúl go bhféadfar uiríolla agus agóidí maidir leis an iarratas a dhéanamh chun an Rialaitheora le linn tréimhse a bheidh sonraithe san fhógra (agus is é a bheidh sa tréimhse sin an tréimhse a ordófar amhlaidh) agus á chur in iúl freisin go bhféadfar fógra faoi na huiríolla agus na hagóidí sin a thabhairt don Rialaitheoir (agus údaraítear leis seo na fógraí sin a thabhairt amhlaidh).

2. Beidh na daoine seo a leanas i dteideal éisteacht a fháil (i bpearsa nó trí abhcóide nó aturnae) le linn iarratas lena mbaineann Airteagal 1 den Sceideal seo a éisteacht ag an Rialaitheoir nó ar achomharc, eadhon:

(a) an t-iarratasóir,

(b) sealbhóir an deonaithe iomchuí cearta póraitheoirí plandaí (murab é an t-iarratasóir é),

(c) aon duine a thug fógra go cuí i ndáil leis an iarratas de bhun rialacháin faoi alt 15 den Acht seo.

3. I gcás ina ndéanfar iarratas faoi alt 17 den Acht seo beidh feidhm ag na forálacha seo a leanas:

(a) féadfaidh an Rialaitheoir nó an Coiste Achomhairc, d'fhonn go bhféadfar úinéireacht na gceart póraitheoirí plandaí iomchuí a fhionnadh, a ordú don iarratasóir fógra a fhoilsiú i cibé foirm agus ar cibé slí a ordóidh an Rialaitheoir,

(b) más deimhin leis an Rialaitheoir nó leis an gCoiste Achomhairc, de réir mar a bheidh, tar éis fiosrú dúthrachtach a dhéanamh nach féidir an sealbhóir iomchuí a aimsiú ná a fhionnadh, féadfar an t-iarratas nó achomharc faoi alt 14 den Acht seo a éisteacht agus a chinneadh d'ainneoin nár aimsíodh nó nár fionnadh an sealbhóir sin.

4. I gcás ina ndéanfaidh an Rialaitheoir cinneadh agus go ndaingneofar nó go n-athrófar é ar achomharc faoin Acht seo, nó i gcás ina ndaingneofar amhlaidh aon diúltú ag an Rialaitheoir nó ina ndéanfar aon chinneadh eile ar an achomharc sin, ansin mura n-ordóidh an Ard-Chúirt nó an Coiste Achomhairc, de réir mar a bheidh, a mhalairt, tiocfaidh an cinneadh ar an achomharc i bhfeidhm an lá díreach tar éis an lae ar a ndéanfar é, agus, i gcás ina dtabharfar ordú den sórt sin tiocfaidh an cinneadh lena mbaineann an t-ordú i bhfeidhm an lá a shonrófar san ordú.

5. Aon uair a dhéanfaidh an Rialaitheoir cinneadh dá dtagraítear i bhfo-alt (1) d'alt 14 den Acht seo nó cinneadh faoi alt 21 (6) den Acht seo, cuirfidh sé faoi deara, a luaithe is féidir tar éis an cinneadh a dhéanamh, fógra faoin gcinneadh a fhoilsiú san Iris, agus luafar san fhógra sin an tréimhse inar féidir achomharc a dhéanamh faoin alt sin 14 nó 21 (6) i ndáil leis an gcinneadh. Tréimhse seasca lá dar tosach dáta an fhógra réamhráite a fhoilsiú a bheidh sa tréimhse réamhráite.


An tAcht dá dTagraítear

Public Offices Fees Act, 1879

1879, c. 58