Uimhir 12 de 1981

AN tACHT UM NÍTRIGIN ÉIREANN TEORANTA, 1981

[An tiontú oifigiúil]

ACHT DO LEASÚ AGUS DO LEATHNÚ NA nACHTANNA UM NÍTRIGIN ÉIREANN TEORANTA, 1963 GO 1977.

[25 Bealtaine, 1981]

ACHTAÍTEAR AG AN OIREACHTAS MAR A LEANAS:

1. —San Acht seo—

ciallaíonn “an Chuideachta” Nítrigin Éireann Teoranta;

ciallaíonn “an tAire” an tAire Tionscail, Tráchtála agus Turasóireachta;

ciallaíonn “an Príomh-Acht” an tAcht um Nítrigin Éireann Teoranta, 1963 .

2. —D'ainneoin aon ní sna hAchtanna um Nítrigin Éireann Teoranta, 1963 go 1977, i meabhrán na Cuideachta nó in airteagail chomhlachais na Cuideachta, £77,500,000 arna roinnt i 77,500,000 scair, £1 an scair, méid scairchaipiteal na Cuideachta, agus féadfaidh an Chuideachta, le toiliú an Aire Airgeadais, na scaireanna i gcaipiteal na Cuideachta a roinnt in aicmí éagsúla agus aon chearta, pribhléidí nó coinníollacha, tosaíochta, iarchurtha, cáilithe nó speisialta, a chur ag gabháil leo faoi seach.

3. —Cuirtear leis seo an t-alt seo a leanas in ionad alt 2 den Phríomh-Acht (a cuireadh isteach leis an Acht um Nítrigin Éireann Teoranta, 1975 ):

“2. Féadfaidh an tAire Airgeadais ó am go ham, tar éis dó dul i gcomhairle leis an Aire, scaireanna d'aon aicme nó aicmí sa Chuideachta a thógáil trí shuibscríobh nó trína gceannach ón sealbhóir suas go dtí méid nach mó san iomlán ná £77,500,000.”.

4. —Leasaítear leis seo alt 7 den Phríomh-Acht trí “£150,000,000” a chur in ionad “£100,000,000” (a cuireadh isteach leis an Acht um Nítrigin Éireann Teoranta, 1977 ) i bhfo-alt (2) agus tá an fo-alt sin arna leasú amhlaidh leagtha amach sa Tábla a ghabhann leis an alt seo.

5. —(1) Féadfar an tAcht um Nítrigin Éireann Teoranta, 1981 , a ghairm den Acht seo.

(2) Féadfar na hAchtanna um Nítrigin Éireann Teoranta, 1963 go 1981, a ghairm de na hAchtanna um Nítrigin Éireann Teoranta, 1963 go 1977, agus den Acht seo le chéile.