Caibidil IV

Cáin Ghnóchan Caipitiúil

29. —Déantar leis seo mír 11 (a cuireadh isteach leis an Acht Airgeadais, 1982 , agus a bhaineann le diúscairt sócmhainní áirithe) de Sceideal 4 a ghabhann leis an Acht um Cháin Ghnóchan Caipitiúil, 1975 , a leasú, maidir le diúscairtí a dhéanfar ar dháta an Achta seo a rith nó dá éis sin, trí “céad míle punt” a chur in ionad “caoga míle punt” i bhfomhír (8), agus tá an fhomhír sin (8) (ar leith ón gcoinníoll), arna leasú amhlaidh, leagtha amach sa Tábla a ghabhann leis an alt seo.

30. —Leasaítear leis seo alt 61 den Acht Airgeadais, 1986 , i bhfo-alt (1), tríd an míniú seo a leanas a chur in ionad an mhínithe ar “tréimhse cháilitheach”:

“ciallaíonn ‘tréimhse cháilitheach’ an tréimhse dar tosach an 4ú lá d'Aibreán, 1986, agus dar críoch an 5ú lá d'Aibreán, 1992;”.

31. —(1) Leasaítear leis seo alt 70 den Acht Airgeadais, 1988 , tríd an mír seo a leanas a chur in ionad mhír (b) d'fho-alt (2):

“(b) Amhail ar agus ó dháta an Achta seo a rith, ní bheidh feidhm ná éifeacht le halt 54 den Acht Airgeadais, 1983 , ná, sa mhéid go mbaineann sí le Bord Telecom Éireann, le mír (b) d'alt 66 den Acht Airgeadais, 1984 .”.

(2) Measfar gur tháinig fo-alt (1) i bhfeidhm, agus glacfaidh sé éifeacht, amhail ar an agus ón 25ú lá de Bhealtaine, 1988.

32. —Leasaítear leis seo alt 19 den Acht um Cháin Ghnóchan Caipitiúil, 1975 —

(a) trí fo-alt (1) den alt sin a thabhairt ar an bhforáil atá ann faoi láthair, agus

(b) tríd an méid seo a leanas a chur leis:

“(2) I dteannta fhorálacha fho-alt (1), ní sócmhainní inmhuirearaithe na conarthaí todhchaíochtaí go léir—

(a) ar conarthaí neamhchoinníollacha iad chun fáil nó diúscairt a dhéanamh ar aon cheann de na hionstraimí dá dtagraítear i bhfo-alt (1) nó aon ionstraimí eile lena mbaineann forálacha an ailt seo de bhua aon achtacháin eile (cibé uair a achtaíodh é), agus

(b) a cheanglaíonn go seachadfaí an ionstraim ar ina leith a dhéantar na conarthaí:

Ar choinníoll go measfar an ceanglas i dtaobh an ionstraim a sheachadadh a bheith comhlíonta i gcás ina ndéanfaidh duine a mbeidh conradh todhchaíochtaí déanta aige, ar conradh é a ndéileáiltear ann nó a luaitear ar mhalartán todhchaíochtaí nó ar stocmhalartán, an conradh todhchaíochtaí a fhoirceannadh trí chonradh todhchaíochtaí eile a dhéanamh, ar conradh é a ndéileáiltear ann nó a luaitear amhlaidh, a ngabhann oibleagáidí leis atá cómhalartach leis na hoibleagáidí a bhí sa chonradh a foirceannadh amhlaidh agus go ndéanfaidh sé dá éis sin socraíocht i leith an dá chonradh trí íocaíocht airgid nó admháil amháin (más ann).”.

33. —(1) I gcás diúscairtí a dhéanfar an 6ú lá d'Aibreán, 1989, nó dá éis, beidh feidhm ag alt 23 den Acht um Cháin Ghnóchan Caipitiúil, 1975 , maidir le gnóchan a fhabhraíonn chuig comhlacht lena mbaineann an t-alt seo mar atá feidhm aige maidir le gnóchan a fhabhraíonn chuig comhlacht a shonraítear san alt sin.

(2) Baineann an t-alt seo leis na comhlachtaí seo a leanas, is é sin le rá:

(a) Bord Fáilte Éireann,

(b) Fáilte Átha Cliath Teoranta,

(c) Fáilte Átha Cliath agus an Oirthir Teoranta,

(d) Fáilte an Oirdheiscirt Teoranta,

(e) Fáilte Chorcaí/Chiarraí Teoranta,

(f) Fáilte an Iarthair Teoranta,

(g) Fáilte Dhún na nGall, Liatroma, Shligigh,

(h) Fáilte Lár na hÉireann Teoranta, agus

(i) Fáilte Thrá Mhór Teoranta.