An Chéad Lch. Lch. Roimhe Seo (CUID XVIII Ilghnéitheach) Ar Aghaidh (CUID XX Leasuithe ar Acht na mBóithre, 1993)

30 2000

An tAcht Um Pleanáil Agus Forbairt, 2000

CUID XIX

Tosach Feidhme, Aisghairm agus Buanú

Léiriú.

263. —Sa Chuid seo, ciallaíonn “achtacháin aisghairthe” na hachtacháin a shonraítear i gcolún (2) den Séú Sceideal.

Aisghairm.

264. —Déantar leis seo na hachtacháin a shonraítear i gcolún (2) den Séú Sceideal a aisghairm a mhéid a shonraítear i gcolún (3) den Sceideal sin.

Leanúnachas achtachán aisghairthe.

265. —(1)  (a)  Ní dhéanfaidh aon ní san Acht seo difear do bhailíocht aon ní a rinneadh faoi na hAchtanna Rialtais Áitiúil (Pleanáil agus Forbairt), 1963 go 1999, nó faoi aon rialacháin a rinneadh faoi na hAchtanna sin.

(b)  Aon ordú, rialachán nó treoir beartais a rinneadh, nó aon ní eile a rinneadh, faoi na hAchtanna Rialtais Áitiúil (Pleanáil agus Forbairt), 1963 go 1999, agus a d'fhéadfaí a dhéanamh faoi fhoráil chomhréire den Acht seo, ní chuirfidh aon aisghairm a dhéantar leis an Acht seo ó bhail é nó í ach, má bhí sé nó sí i bhfeidhm díreach sula ndearnadh an aisghairm sin, beidh éifeacht leis nó léi amhail is dá mba faoi fhoráil chomhréire den Acht seo a rinneadh é nó í, mura bhforáiltear a mhalairt.

(2)  Ní dhéanfar difear do leanúnachas oibriú an dlí a bhaineann leis na nithe dá bhforáiltear sna hachtacháin aisghairthe mar gheall ar an Acht seo a chur in ionad na n-achtachán sin, agus—

(a)  déanfar an oiread sin d'aon achtachán nó doiciméad (lena n-áirítear achtacháin atá san Acht seo) a thagraíonn, go sainráite nó go hintuigthe, d'aon fhoráil den Acht seo, nó do nithe a rinneadh nó a bheidh le déanamh faoi réim nó chun críocha aon fhorála den Acht seo, a fhorléiriú, má cheadaíonn agus a mhéid a cheadaíonn an cineál ábhair atá san achtachán nó sa doiciméad é, mar ní a fholaíonn, i ndáil leis na tráthanna, na blianta nó na tréimhsí, na himthosca nó na críocha a bhfuil nó a raibh éifeacht leis an bhforáil chomhréire sna hachtacháin aisghairthe i ndáil leo, tagairt don fhoráil chomhréire sin, nó, de réir mar a bheidh, do nithe a rinneadh nó a bheidh le déanamh faoi réim nó chun críocha na forála comhréire sin,

(b)  déanfar an oiread sin d'aon achtachán nó doiciméad (lena n-áirítear achtacháin aisghairthe agus achtacháin agus doiciméid a rithfear nó a dhéanfar tar éis thosach feidhme an Achta seo) a thagraíonn, go sainráite nó go hintuigthe, d'aon fhoráil de na hachtacháin aisghairthe, nó do nithe a rinneadh nó a bheidh le déanamh faoi réim nó chun críocha aon fhorála de na hachtacháin aisghairthe, a fhorléiriú, má cheadaíonn agus a mhéid a cheadaíonn an cineál ábhair atá san achtachán nó sa doiciméad é, mar ní a fholaíonn, i ndáil leis na tráthanna, na blianta nó na tréimhsí, na himthosca nó na críocha a bhfuil éifeacht le foráil chomhréire an Achta seo i ndáil leo, tagairt don fhoráil chomhréire sin, nó, de réir mar a bheidh, do nithe a rinneadh nó a mheastar a rinneadh nó a bheidh le déanamh faoi réim nó chun críocha na forála comhréire sin.

(3)  D'ainneoin aisghairm alt 69 d'Acht 1963 le hAcht 1990, beidh feidhm ag alt 2 den Acquisition of Land (Assessment of Compensation) Act, 1919, arna leasú le halt 69(1) d'Acht 1963, maidir le gach cás, seachas cás faoin Acht seo nó faoi Acht 1990, ina mbeidh aon chúiteamh a mheasúnófar iníoctha ag údarás pleanála nó ag aon údarás áitiúil eile.

(4)  I gcás aon iarratais chuig údarás pleanála, nó aon achomhairc nó aon ní eile is cúram don Bhord agus a bheidh faighte ag an údarás pleanála nó ag an mBord, de réir mar a bheidh, roimh aisghairm na bhforálacha iomchuí nó cúlghairm aon rialachán gaolmhar, leanfaidh na hAchtanna Rialtais Áitiúil (Pleanáil agus Forbairt), 1963 go 1999, agus rialacháin arna ndéanamh fúthu, d'fheidhm a bheith acu maidir leis an iarratas, leis an achomharc nó leis an ní eile d'ainneoin aisghairm aon achtacháin nó chúlghairm aon rialacháin.

Forálacha idirthréimhseacha maidir le pleananna forbartha.

266. —(1)  (a)  D'ainneoin aisghairm aon achtacháin leis an Acht seo, leanfaidh pleananna forbartha a rinneadh faoi Chuid III d'Acht 1963 de bheith i bhfeidhm agus measfar gur faoin Acht seo agus de réir an Achta seo a rinneadh iad.

(b)  D'ainneoin aisghairm aon achtacháin leis an Acht seo, i gcás ina mbeidh fógra i dtaobh ullmhú dréacht-phlean forbartha tugtha ag údarás pleanála faoi alt 21 d'Acht 1963, leanfaidh Cuid III d'Acht 1963 d'fheidhm a bheith aici maidir leis an dréacht-phlean sin go dtí go ndéanfar an plean sin.

(2)  (a)  Más rud é, ar thosach feidhme Chuid II, go mbeidh plean forbartha i bhfeidhm tráth is faide ná 4 bliana, tionscnóidh an t-údarás pleanála, tráth nach déanaí ná bliain tar éis an tosach feidhme sin, na nósanna imeachta chun fógra a thabhairt faoi alt 11.

(b)  Ach amháin mar a fhoráiltear i mír (a) agus i bhfo-alt (1)(b), beidh feidhm maidir le gach plean forbartha láithreach ag forálacha Chuid II i ndáil le pleananna forbartha a athbhreithniú agus le pleananna nua a ullmhú.

(c)  Chun críocha mhíreanna (a) agus (b), an tagairt don phlean forbartha is tagairt í don phlean forbartha a bheidh i bhfeidhm do limistéar feidhme an údaráis pleanála agus ar plean forbartha é a chlúdaíonn an limistéar feidhme sin go léir nó an chuid is mó den limistéar feidhme sin, agus measfar—

(i)  maidir le plean forbartha do bhaile mór sceidealta, de réir bhrí alt 2 d'Acht 1963, nó

(ii)  maidir le plean forbartha nach gclúdaíonn ach cuid de limistéar feidhme an údaráis (nach í an chuid is mó í),

nach plean forbartha é chun críocha na míreanna sin.

(3)  Aon tagairt in aon achtachán nó ionstraim do phlean forbartha, measfar gur tagairt í do phlean forbartha mar a mhínítear san Acht seo é.

Forálacha idirthréimhseacha i dtaca le fáil éigeantach talún.

267. —(1)  Más rud é, sula n-aistrítear feidhmeanna chuig an mBord de réir ailt 214 agus 215, go raibh aon ní le cinneadh ag an Aire faoi na hachtacháin dá dtagraítear sna hailt sin, déanfaidh an Bord, in ionad an Aire, an ní a chinneadh de réir na n-alt sin.

(2)  Ní bheidh feidhm ag ailt 217, 218, 219, 220, 221 agus 222 maidir le nithe dá dtagraítear i bhfo-alt (1) agus a bheidh le cinneadh ag an mBord de réir an fho-ailt sin.

Forálacha idirthréimhseacha ilghnéitheacha.

268. —(1)  D'ainneoin aisghairm aon achtacháin leis an Acht seo—

(a)  leanfaidh fo-ailt (2) go (5) d'alt 38 d'Acht 1999 d'fheidhm a bheith acu maidir le húdarás pleanála go dtí go mbeidh na cinntí a cheanglaítear a dhéanamh leis na fo-ailt sin déanta ag an údarás pleanála agus seirbheáilte aige ar na húinéirí agus ar na háititheoirí cuí,

(b)  maidir le scéim chun pinsin, aiscí nó liúntais eile a dheonú, faoi Acht a aisghairtear leis an Acht seo, i leith chathaoirleach agus ghnáthchomhaltaí an Bhoird nó i leith fostaithe lánaimseartha de chuid an Bhoird, leanfaidh sí de bheith i bhfeidhm agus measfar gur scéim í faoi alt 119121, de réir mar is cuí,

(c)  maidir le hordú um limistéar taitneamhachta speisialta nó le hordú slánchoimeádta crann a daingníodh nó a rinneadh faoi Acht a aisghairtear leis an Acht seo agus a bheidh i bhfeidhm díreach roimh thosach feidhme an ailt seo, measfar é a bheith daingnithe nó déanta faoi alt 203205, de réir mar is cuí,

(d)  leanfaidh mír 12 den Tríú Sceideal a ghabhann le hAcht 1990 d'fheidhm a bheith aici ar feadh tréimhse 3 bliana ó thosach feidhme an ailt seo, agus

(e)  leanfaidh alt 55A (arna chur isteach le hAcht na mBóithre (Leasú), 1998) d'Acht na mBóithre, 1993 (arna chur isteach le halt 6 d'Acht na mBóithre (Leasú), 1998) d'fheidhm a bheith aige i ndáil le hordú ón Aire faoi alt 49(3) nó 51(6) den Acht sin.

(2)  Aon chóid chleachtais a bhaineann le hócáidí a sheoladh agus a bheidh eisithe ag an Aire nó ag aon Aire eile den Rialtas roimh theacht i bhfeidhm don Acht seo, measfar gur cóid chleachtais iad faoi alt 232.

(3)  (a)  D'ainneoin alt 191, beidh cúiteamh iníoctha faoi alt 190 más rud é gur diúltaíodh cead faoi Chuid III ar na forais a shonraítear i mír 5 den Cheathrú Sceideal, agus más rud é—

(i)  go raibh sa phlean forbartha, roimh theacht i ngníomh d'alt 10, cuspóir maidir le criosú na talún lenar bhain an t-iarratas lena mbaineann d'fhonn é a úsáid d'aon toisc nó go príomha chun na críche ar chuici a rinneadh an t-iarratas, agus

(ii)  go ndearnadh an t-iarratas ar chead tráth nach déanaí ná 3 bliana tar éis don alt seo teacht i ngníomh.

(b)  Ní bheidh feidhm ag mír (a) maidir le cead a dhiúltú más rud é—

(i)  gur forbairt d'aicme nó de thuairisc atá leagtha amach sa Tríú Sceideal í an fhorbairt, nó

(ii)  go ndearnadh an diúltú ar fhorais a shonraítear sa Cheathrú Sceideal (seachas i mír (a)).

Rialacháin chun deireadh a chur le deacrachtaí.

269. —Má éiríonn aon deacracht, le linn na tréimhse 3 bliana ó thosach feidhme an Achta seo, i ndáil le haon fhoráil den Acht seo a thabhairt i ngníomh nó i ndáil le hoibriú aon fhorála, féadfaidh an tAire le rialacháin aon ní a dhéanamh is dóigh leis an Aire is gá nó is fóirsteanach chun deireadh a chur leis an deacracht, chun an fhoráil sin a thabhairt i ngníomh, nó chun a hoibriú a áirithiú nó a éascú.

Tosach feidhme.

270. —(1)  Tiocfaidh an tAcht seo i ngníomh cibé lá nó laethanta a cheapfaidh an tAire le hordú nó le horduithe, i gcoitinne nó faoi threoir aon chríche nó forála áirithe, agus féadfar laethanta éagsúla a shocrú amhlaidh chun críoch éagsúil agus le haghaidh forálacha éagsúla.

(2)  Féadfar le hordú faoi fho-alt (1), maidir leis na haisghairmeacha a dhéantar le halt 264 ar na hachtacháin a luaitear sa Séú Sceideal, laethanta éagsúla a shocrú chun achtacháin éagsúla a aisghairm nó chun aon achtachán a aisghairm chun críoch éagsúil.