An Chéad Lch. Lch. Roimhe Seo (CUID IV Oidhreacht Ailtireachta) Ar Aghaidh (CUID V Soláthar Tithíochta)

30 2000

An tAcht Um Pleanáil Agus Forbairt, 2000

Caibidil II

Limistéir Chaomhantais Ailtireachta agus Limistéir Rialaithe Pleanála Speisialta

Limistéir chaomhantais ailtireachta.

81. —(1)  Áireofar cuspóir i bplean forbartha chun sainghné áite, limistéir, grúpa déanmhas nó bailedhreacha a shlánchoimeád, agus línte agus airde foirgneamh á gcur i gcuntas—

(a)  ar díol spéise ar leith é nó í, nó atá luachmhar, ó thaobh ailtireachta, staire, seandálaíochta, ealaíne, cultúir, eolaíochta, nó cúrsaí sóisialta nó teicniúla, nó

(b)  a chuireann leis an meas atá ar dhéanmhais chosanta,

más é tuairim an údaráis pleanála gur gá é a chur isteach chun sainghné na háite, an limistéir, an ghrúpa déanmhas nó an bhailedhreacha lena mbaineann a shlánchoimeád, agus “limistéar caomhantais ailtireachta” a thabharfar ar aon áit, limistéar, grúpa déanmhas nó bailedhreach den sórt sin agus sin a ghairtear de san Acht seo.

(2)  I gcás ina n-áireofar cuspóir dá dtagraítear i bhfo-alt (1) i bplean forbartha, áireofar an cuspóir sin freisin in aon phlean forbartha a chuirfear in ionad an phlean forbartha chéadluaite, faoi réir aon athraithe air sin faoi alt 13.

Forbairt i limistéir chaomhantais ailtireachta.

82. —(1)  D'ainneoin alt 4(1)(h), ní forbairt dhíolmhaithe é oibreacha a dhéanamh ar an taobh amuigh de dhéanmhas atá lonnaithe i limistéar caomhantais ailtireachta, ach amháin mura ndéanfadh na hoibreacha sin difear ábhartha do shainghné an limistéir.

(2)  Le linn dó iarratas ar chead forbartha i ndáil le talamh atá suite i limistéar caomhantais ailtireachta a bhreithniú, déanfaidh údarás pleanála, nó déanfaidh an Bord ar achomharc, an éifeacht ábhartha (más ann) is dóigh a bheadh ag an bhforbairt bheartaithe ar shainghné an limistéir caomhantais ailtireachta a chur san áireamh.

Cumhacht chun déanmhas nó talamh eile a fháil i limistéar caomhantais ailtireachta.

83. —(1)  Féadfaidh údarás pleanála aon talamh atá suite laistigh de limistéar caomhantais ailtireachta a fháil, trí chomhaontú nó go héigeantach, más é tuairim an údaráis pleanála—

(a)  gur gá déanamh amhlaidh chun sainghné an limistéir caomhantais ailtireachta a shlánchoimeád, agus

(b)  (i)  go mbaineann, nó gur dóigh go mbainfidh, bail na talún, nó an úsáid atá á baint as an talamh nó as aon déanmhas atá ar an talamh, de shainghné nó de dhreach an limistéir caomhantais ailtireachta go feadh méid ábhartha, nó

(ii)  gur gá an talamh a fháil chun an limistéar caomhantais ailtireachta a fhorbairt nó a athnuachan nó chun taitneamhachtaí a sholáthar sa limistéar.

(2)  Ní dhéanfaidh údarás pleanála aon talamh atá á áitiú go dleathach mar theach cónaithe ag aon duine seachas duine atá fostaithe ann mar airíoch a fháil go héigeantach faoi fho-alt (1).

(3)  Beidh feidhm ag ailt 71(2) go 78 den Acht seo, faoi réir aon mhodhnuithe is gá, maidir le fálacha faoi fho-alt (1) agus déanfar tagairtí sna forálacha sin do dhéanmhas cosanta a fhorléiriú, chun críocha an ailt seo, mar thagairtí do dhéanmhas nó do thalamh eile atá suite laistigh de limistéar caomhantais ailtireachta.

Limistéar rialaithe pleanála speisialta.

84. —(1)  Féadfaidh údarás pleanála, más dóigh leis go bhfuil tábhacht ar leith ag baint le limistéar caomhantais ailtireachta ina iomláine, nó le cuid de, do shaol cathartha nó do shainghné ailtireachta, staire, cultúrtha nó sóisialta cathrach nó baile ina bhfuil sé suite, nó maidir leis an gcéanna, scéim a ullmhú ina leagfar amach cuspóirí forbartha maidir le caomhnú agus feabhsú an limistéir sin, nó cuid den limistéar sin, agus ina ndéanfar socrú i dtaobh nithe a bhaineann leis an méid sin.

(2)  Gan dochar do ghinearáltacht fho-alt (1), féadfaidh cuspóirí (agus forálacha chun na cuspóirí sin a chur ar aghaidh nó a bhaint amach) a bheith i scéim a ullmhófar faoin bhfo-alt sin, ar cuspóirí iad maidir leis na nithe seo a leanas—

(a)  ardchaighdeán taitneamhachta cathartha agus deartha chathartha a chur chun cinn;

(b)  an comhshaol, lena n-áirítear an oidhreacht ailtireachta, seandálaíochta agus nádúrtha, a shlánchoimeád agus a chosaint;

(c)  an sráid-dreach, an leagan amach agus an gréasán foirgníochta, lena n-áirítear comhordú agus uasghrádú éadanas siopaí, a athnuachan, a shlánchoimeád, a chaomhnú, a aisiriú, a fhorbairt nó a athfhorbairt;

(d)  leagan amach limistéar, dlús, línte foirgneamh agus airde déanmhas a rialú agus déileáil le spásanna timpeall ar dhéanmhais agus idir déanmhais;

(e)  dearadh agus dathanna déanmhas, agus na hábhair a bheidh iontu, a rialú, go háirithe cineál nó cáilíocht ábhar tógála a úsáidfear i ndéanmhais;

(f)  cothabháil, deisiú nó glanadh déanmhas a chur chun cinn;

(g)  meascadh cuí úsáidí déanmhas nó talún eile a chur chun cinn;

(h)  aon úsáidí nua nó úsáidí láithreacha déanmhas nó talún eile a rialú;

(i)  forbairt nó athfhorbairt láithreán tréigthe nó láithreán folamh a chur chun cinn; nó

(j)  tógáil déanmhas fógráin agus taispeáint fógrán a rialáil, a shrianadh nó a rialú.

(3)  Maidir le scéim a ullmhófar faoi fho-alt (1), beidh sí i scríbhinn agus beidh sí ar comhréir le cuspóirí an phlean forbartha iomchuí agus le cuspóirí aon phlean limistéir áitiúil nó aon phlean limistéir comhtháite (de réir bhrí an Achta um Athnuachan Uirbeach, 1998) a bheidh i bhfeidhm i ndáil leis an limistéar lena mbaineann an scéim.

(4)  (a)  Cuirfear in iúl, i scéim a ullmhófar faoi fho-alt (1), an tréimhse a mbeidh an scéim le fanacht i bhfeidhm ar a feadh.

(b)  Féadfar a chur in iúl i scéim an t-ord ina mbeartaítear cuspóirí na scéime, nó forálacha chun na cuspóirí sin a chur ar aghaidh nó a bhaint amach, a chur i ngníomh.

(5)  Beidh faisnéis i scéim, lena n-áirítear faisnéis de cibé aicme nó aicmí a fhorordóidh an tAire, maidir leis na héifeachtaí suntasacha is dócha a bheadh ag an scéim, dá gcuirfí i ngníomh í, ar an gcomhshaol.

(6)  San alt seo, agus in ailt 85 agus 86

ciallaíonn “cathair” contaebhuirg;

ciallaíonn “baile” buirg (seachas contaebhuirg), ceantar uirbeach nó baile ag a bhfuil coimisinéirí baile agus ar mó ná 2,000 a dhaonra.

Scéim rialaithe pleanála speisialta.

85. —(1)  Déanfar, ar rún a bheith rite ag an údarás pleanála lena mbaineann, fo-ailt (2), (3), (4), (5) agus (6) a chomhlíonadh i ndáil leis an scéim a shonrófar sa rún.

(2)  Déanfaidh an t-údarás pleanála, a luaithe is féidir tar éis rún a rith faoi fho-alt (1)

(a)  fógra i scríbhinn a thabhairt don Aire, don Bhord agus do cibé daoine eile a fhorordófar, maidir le hullmhú na scéime,

(b)  cóipeanna den scéim a chur chuig gach duine de na daoine dá dtagraítear i mír (a), agus

(c)  fógra maidir le hullmhú na scéime a fhoilsiú i nuachtán amháin nó níos mó a scaiptear sa chathair nó sa bhaile lena mbaineann.

(3)  I bhfógra faoi fho-alt (2)

(a)  cuirfear in iúl cén áit nó cé na háiteanna ina bhféadfar, agus cén tréimhse (nach lú ná 8 seachtain) ar lena linn a fhéadfar agus cé na tráthanna ag a bhféadfar cóip den scéim a iniúchadh (agus coimeádfar cóip den scéim ar fáil lena hiniúchadh dá réir sin), agus

(b)  lorgófar aighneachtaí nó tuairimí i ndáil leis an scéim laistigh de cibé tréimhse (nach lú ná 8 seachtain) a shonrófar san fhógra.

(4)  (a)  I gcás ina mbeidh, i scéim a ullmhófar faoi fho-alt (1), cuspóir nó foráil a bhaineann leis na nithe seo a leanas—

(i)  comhordú, uasghrádú nó athrú éadanas siopaí sonraithe,

(ii)  leagan amach limistéar sonraithe, dlúis, línte foirgneamh agus airde déanmhas sonraithe a rialú agus déileáil le spásanna timpeall ar dhéanmhais shonraithe agus idir déanmhais shonraithe,

(iii)  dearadh agus dathanna déanmhas sonraithe, agus na hábhair a bheidh iontu, a rialú,

(iv)  cothabháil, deisiú nó glanadh déanmhas sonraithe a chur chun cinn,

(v)  úsáid nó úsáidí aon déanmhais shonraithe nó talún eile sa limistéar a rialú,

(vi)  scor d'úsáid láithreach aon déanmhais shonraithe nó talún eile,

(vii)  forbairt nó athfhorbairt láithreán tréigthe sonraithe nó láithreán folamh sonraithe, nó

(viii)  déanmhais fógráin shonraithe nó taispeáint fógrán sonraithe a rialú,

déanfaidh an t-údarás pleanála, a luaithe is féidir tar éis rún a dhéanamh faoi fho-alt (1), fógra i scríbhinn a thabhairt do gach duine is úinéir nó áititheoir talún a ndéanann an cuspóir nó an fhoráil difear di, ar fógra é maidir leis an gcuspóir nó leis an bhforáil lena mbaineann.

(b)  I bhfógra faoi mhír (a), déanfar tagairt don talamh lena mbaineann agus—

(i)  sonrófar na bearta a cheanglaítear a ghlacadh i leith an déanmhais nó na talún eile chun a chinntiú go gcomhlíonfar an cuspóir nó na cuspóirí beartaithe,

(ii)  cuirfear in iúl cén áit nó cé na háiteanna ina bhféadfar, agus cén tréimhse (nach lú ná 8 seachtain) ar lena linn a fhéadfar agus na tráthanna ag a bhféadfar cóip den scéim a iniúchadh (agus coimeádfar an chóip ar fáil lena hiniúchadh dá réir sin), agus

(iii)  lorgófar aighneachtaí nó tuairimí i ndáil leis an gcuspóir beartaithe nó leis an bhforáil bheartaithe laistigh de cibé tréimhse (nach lú ná 8 seachtain) a shonrófar san fhógra.

(5)  (a)  Tráth nach déanaí ná 12 sheachtain tar éis fógra faoi fho-alt (2) agus, más cuí, fógra faoi fho-alt (4), a thabhairt, cibé acu is déanaí a tharlóidh, ullmhóidh bainisteoir údaráis pleanála tuarascáil maidir le haon aighneachtaí nó tuairimí a gheofar i ndáil le scéim a ullmhófar faoi fho-alt (1) agus cuirfidh sé an tuarascáil faoi bhráid chomhaltaí an údaráis lena breithniú acu.

(b)  I dtuarascáil faoi mhír (a)

(i)  liostófar na daoine a rinne aighneachtaí nó a thug tuairimí i ndáil leis an scéim,

(ii)  tabharfar achoimre ar na nithe a bheidh dúisithe sna haighneachtaí nó sna tuairimí sin, agus

(iii)  beidh freagra an bhainisteora ar na haighneachtaí nó na tuairimí.

(6)  Le linn dó nó di freagairt d'aighneachtaí a rinneadh nó do thuairimí a tugadh i ndáil le scéim a ullmhófar faoi fho-alt (1), beidh aird ag bainisteoir údaráis pleanála ar phleanáil chuí agus forbairt inchothaithe an limistéir, ar oibleagáidí reachtúla aon údaráis áitiúil sa limistéar agus ar aon bheartais nó cuspóirí iomchuí de chuid an Rialtais nó de chuid aon Aire den Rialtas.

(7)  Féadfaidh údarás pleanála le rún, tar éis dó scéim a ullmhófar faoi fho-alt (1) agus tuarascáil an bhainisteora faoi fho-alt (5) a bhreithniú, an scéim a cheadú fara modhnuithe nó dá n-éagmais, nó diúltú í a cheadú amhlaidh, agus “scéim cheadaithe” a thabharfar ar scéim a cheadófar amhlaidh agus sin a ghairtear di sa Chuid seo.

(8)  Maidir le limistéar caomhantais ailtireachta, nó leis an gcuid sin de limistéar caomhantais ailtireachta lena mbaineann scéim a cheadóidh údarás pleanála faoi fho-alt (7), “limistéar rialaithe pleanála speisialta” a thabharfar air nó uirthi agus sin a ghairtear de nó di san Acht seo.

(9)  (a)  I gcás ina gceadóidh údarás pleanála scéim faoi fho-alt (7), foilseoidh sé fógra maidir leis an gceadú i nuachtán amháin nó níos mó a scaiptear sa chathair nó sa bhaile lena mbaineann.

(b)  Cuirfear in iúl, i bhfógra faoi mhír (a), cén áit nó cé na háiteanna ina bhféadfar, agus cé na tráthanna ar lena linn a fhéadfar, scéim cheadaithe a iniúchadh (agus coimeádfar cóip di ar fáil lena hiniúchadh dá réir sin).

(c)  Cuirfidh údarás pleanála cóip den scéim chuig an Aire, chuig an mBord agus chuig cibé daoine eile a fhorordófar.

Scéim a athrú agus a athbhreithniú.

86. —(1)  Déanfaidh údarás pleanála, ó am go ham de réir mar is gá sna himthosca agus in aon chás tráth nach déanaí ná 6 bliana—

(a)  tar éis scéim a cheadú faoi alt 85(7), nó

(b)  tar éis an athbhreithnithe is déanaí a rinneadh ar scéim,

scéim cheadaithe a athbhreithniú agus féadfaidh sé, le rún, an scéim a leasú nó a chúlghairm.

(2)  I gcás ina mbeartaíonn údarás pleanála scéim cheadaithe a leasú faoin alt seo, beidh feidhm ag alt 85, faoi réir aon mhodhnuithe is gá, maidir le haon leasú den sórt sin.

(3)  Tabharfar fógra maidir le cúlghairm scéime ceadaithe faoin alt seo i nuachtán amháin nó níos mó a scaiptear sa chathair nó sa bhaile lena mbaineann.

(4)  Ní dochar leasú nó cúlghairm scéime ceadaithe do bhailíocht aon ní a rinneadh roimhe sin faoin scéim.

Forbairt i limistéar rialaithe pleanála speisialta.

87. —(1)  D'ainneoin alt 4 agus aon rialachán arna ndéanamh faoi, ní forbairt dhíolmhaithe aon fhorbairt laistigh de limistéar rialaithe pleanála speisialta má sháraíonn sí scéim cheadaithe a bhaineann leis an limistéar sin.

(2)  Le linn dó iarratas ar chead i ndáil le talamh atá suite i limistéar rialaithe pleanála speisialta a bhreithniú, beidh aird ag an údarás pleanála, nó ag an mBord ar achomharc, i dteannta na nithe atá leagtha amach in alt 34, ar fhorálacha scéime ceadaithe.

(3)  Féadfaidh úinéir nó áititheoir talún atá suite i limistéar rialaithe pleanála speisialta iarraidh i scríbhinn a dhéanamh chuig an údarás pleanála, ar laistigh dá limistéar feidhme atá an limistéar rialaithe pleanála speisialta suite, ar dhearbhú maidir leis na nithe seo a leanas—

(a)  na forbairtí sin nó na haicmí forbartha sin is dóigh leis nó léi a bheadh nó nach mbeadh, de réir mar a bheidh, contrártha don scéim cheadaithe lena mbaineann,

(b)  na cuspóirí nó na forálacha den scéim cheadaithe a bhaineann leis an talamh, nó

(c)  na bearta a cheanglaítear a ghabháil de láimh i leith na talún chun a chinntiú go gcomhlíonfar na cuspóirí sin nó na forálacha sin.

(4)  Laistigh de 12 sheachtain tar éis don údarás pleanála iarraidh faoi fho-alt (3) a fháil, nó laistigh de cibé tréimhse eile a fhorordófar le rialacháin an Aire, eiseoidh údarás pleanála dearbhú faoin alt seo don duine a rinne an iarraidh.

(5)  Féadfaidh údarás pleanála aon tráth dearbhú faoin alt seo a chealú nó a athrú.

(6)  Ní dhéanfaidh cealú nó athrú dearbhaithe faoi fho-alt (5) difear d'aon fhorbairt a bheidh tosaithe roimh an gcealú nó roimh an athrú ar iontaoibh an dearbhaithe lena mbaineann agus a mbeidh sé curtha in iúl ag an údarás pleanála, de réir mhír (a) d'fho-alt (3), nach mbeadh sí contrártha do scéim cheadaithe.

(7)  Ní dochar dearbhú faoin alt seo d'fheidhm alt 5.

(8)  Cuirfidh údarás pleanála faoi deara—

(a)  go ndéanfar sonraí aon dearbhaithe a eiseoidh an t-údarás sin faoin alt seo a thaifeadadh ar an gclár a bheidh á choimeád ag an údarás faoi alt 7, agus

(b)  go ndéanfar cóip den dearbhú a chur ar fáil lena hiniúchadh ag daoine den phobal le linn uaireanta oifige, i bpríomhoifig an údaráis, tar éis an dearbhú a eisiúint.

Fógra a sheirbheáil i ndáil le déanmhais nó talamh eile i limistéar rialaithe pleanála speisialta.

88. —(1)  Féadfaidh údarás pleanála fógra a chomhlíonfaidh fo-alt (2) a sheirbheáil ar gach duine is úinéir nó áititheoir talún lena mbaineann cuspóir nó foráil de scéim cheadaithe.

(2)  I bhfógra faoi fho-alt (1)

(a)  déanfar tagairt don déanmhas nó don talamh lena mbaineann,

(b)  sonrófar an dáta a dtiocfaidh an fógra i bhfeidhm,

(c)  sonrófar na bearta a cheanglaítear a ghabháil de láimh ar theacht i bhfeidhm don fhógra, lena n-áirítear, de réir mar is cuí, bearta—

(i)  chun aon déanmhas a aisiriú, a scartáil, a dhíchur, a athrú, a aischur, a chothabháil, a dheisiú nó a ghlanadh, nó

(ii)  chun scor d'aon úsáid nó chun leanúint d'aon úsáid faoi réir coinníollacha,

(d)  iarrfar ar an duine ar a seirbheálfar an fógra, laistigh de cibé tréimhse a shonrófar san fhógra (nach lú ná 8 seachtain ó dháta seirbheála an fhógra), uiríll i scríbhinn a dhéanamh chuig an údarás pleanála maidir leis an bhfógra,

(e)  iarrfar ar an duine dul i mbun pléití leis an údarás pleanála, laistigh de cibé tréimhse a shonrófar san fhógra (nach lú ná 8 seachtain ó dháta seirbheála an fhógra) maidir leis na nithe dá dtagraítear san fhógra agus go háirithe maidir leis na nithe seo a leanas—

(i)  an tréimhse ar lena linn a ghlacfar na bearta a shonrófar san fhógra, agus

(ii)  an t-údarás pleanála do sholáthar comhairle, ábhar, trealaimh, seirbhísí fhoireann an údaráis nó cabhrach eile is gá chun na hoibreacha a shonrófar san fhógra a dhéanamh, agus

(f)  sonrófar an tréimhse ar lena linn, mura gcomhaontófar a mhalairt sna pléití a rachfar ina mbun de bhun iarrata san fhógra de réir mhír (e), a ghlacfar na bearta a shonrófar san fhógra, ar tréimhse í nach lú ná 8 seachtain ón dáta a dtiocfaidh an fógra i bhfeidhm,

(g)  luafar go n-íocfaidh an t-údarás pleanála aon chaiteachais a thabhóidh an duine sin le réasún le linn dó nó di na bearta a shonrófar san fhógra a ghlacadh, seachas caiteachais a bhaineann le forbairt neamhúdaraithe a rinneadh 7 mbliana ar a mhéad roimh sheirbheáil an fhógra, agus

(h)  luafar go ndéanfaidh an t-údarás pleanála suim a íoc, mar chúiteamh, le haon duine a shuífidh gur tharla, de thoradh an fógra a chomhlíonadh—

(i)  gur laghdaíodh luach leasa a bhí aige nó aici sa talamh nó i gcuid den talamh, ar leas é a bhí ar marthain tráth an fhógra, nó

(ii)  gur bhain damáiste dó nó di, ó tharla go raibh leas aige nó aici sa talamh an tráth sin, mar gheall ar theachtadh an déanmhais nó na talún eile aige nó aici a dhíshocrú,

ar suim í atá comhionann le méid an laghdaithe sin ar an luach nó ar suim í i leith an damáiste a bhain dó nó di.

(3)  Má ghlactar leis an iarraidh i bhfógra de réir fho-alt (2)(d) dul i mbun pléití, glacfaidh an t-údarás pleanála na bearta sin go léir is gá chun go mbeidh na pléití lena mbaineann ann.

(4)  Tar éis dó aon uiríll a rinneadh agus aon phléití a seoladh de bhun iarrataí i bhfógra faoi fho-alt (2) a bhreithniú, féadfaidh an t-údarás pleanála an fógra a dhaingniú, a leasú nó a chúlghairm agus cuirfidh sé sin in iúl i scríbhinn don duine ar a mbeidh an fógra dírithe.

(5)  Féadfaidh aon duine ar a seirbheálfar fógra faoi fho-alt (1), laistigh de 8 seachtain ón dáta a gcuirfear daingniú nó leasú an fhógra faoi fho-alt (4) in iúl dó nó di, achomharc a thionscnamh chun an Bhoird i gcoinne an fhógra.

(6)  I gcás ina dtionscnófar achomharc faoi fho-alt (5) i gcoinne fógra, féadfaidh an Bord, tar éis dó aird a thabhairt—

(a)  ar phleanáil chuí agus forbairt inchothaithe an limistéir,

(b)  ar fhorálacha an phlean forbartha don limistéar,

(c)  ar aon phlean limistéir áitiúil nó aon phlean limistéir comhtháite (de réir bhrí an Achta um Athnuachan Uirbeach, 1998) a bheidh i bhfeidhm maidir leis an limistéar lena mbaineann an scéim, agus

(d)  ar fhorálacha na scéime ceadaithe lena mbaineann, an fógra a dhaingniú fara modhnuithe nó dá n-éagmais, nó é a neamhniú.

(7)  Féadfar fógra a sheirbheálfaidh údarás pleanála faoi fho-alt (1) a tharraingt siar, ar chúiseanna sonraithe, le fógra i scríbhinn.

(8)  Ní thiocfaidh fógra faoin alt seo (seachas fógra a bheidh tarraingthe siar) i bhfeidhm—

(a)  go dtí go mbeidh aon tréimhse, ar lena linn a fhéadfar achomharc i gcoinne an fhógra a thionscnamh, caite, nó

(b)  i gcás ina ndéanfar achomharc i gcoinne an fhógra, nuair a bheidh an t-achomharc tarraingthe siar nó cinnte,

de réir mar is cuí.

An fógra faoi alt 88 a chur i ngníomh.

89. —Más rud é nach mbeifear, laistigh de 8 seachtain ón dáta a dtiocfaidh an fógra i bhfeidhm nó cibé tréimhse is faide ná sin ar a gcomhaontóidh an t-údarás pleanála agus an duine ar a mbeidh an fógra dírithe, tar éis an t-aisiriú, an scartáil, an díchur, an t-athrú, an t-aischur, an chothabháil, an deisiú nó an glanadh a cheanglaítear leis an bhfógra a dhéanamh, féadfaidh an t-údarás pleanála, faoi réir alt 252, dul isteach sa déanmhas nó ar an talamh agus an t-aisiriú, an scartáil, an t-athrú, an t-aischur, an chothabháil, an deisiú nó an glanadh sin a shonrófar san fhógra a dhéanamh.

Féadfaidh cúirt a ordú fógra faoi alt 88 a chomhlíonadh.

90. —(1)  I gcás ina mainneoidh duine ar a seirbheálfar fógra faoi alt 88 ceanglas de chuid an fhógra a chomhlíonadh, nó ina gcuirfidh sé nó sí faoi deara nó ina gceadóidh sé nó sí do dhuine mainneachtain ceanglas den sórt sin a chomhlíonadh, féadfaidh an Ard-Chúirt nó an Chúirt Chuarda, ar iarratas ón údarás pleanála, a ordú d'aon duine an fógra a chomhlíonadh nó aon ní a dhéanamh a mheasfaidh an Chúirt is gá nó is fóirsteanach chun a chinntiú go gcomhlíonfar téarmaí an fhógra sin, nó staonadh óna dhéanamh nó ó leanúint dá dhéanamh.

(2)  Féadfar, in ordú faoi fho-alt (1), gan dochar don fho-alt sin, a cheangal ar cibé duine a shonrófar san ordú aon oibreacha a dhéanamh, lena n-áirítear aisiriú, scartáil, díchur, athrú, aischur, cothabháil, deisiú nó glanadh aon déanmhais nó aon ghné eile, nó scor d'aon úsáid nó leanúint d'aon úsáid faoi réir cibé coinníollacha a shonrófar san ordú.

(3)  (a)  Is trí fhoriarratas a dhéanfar iarratas chuig an Ard-Chúirt nó chuig an gCúirt Chuarda ar ordú faoi fho-alt (1) agus féadfaidh an Chúirt, nuair a bheidh an ní á bhreithniú aici, cibé ordú eatramhach nó idirbhreitheach, más ann, is cuí léi a dhéanamh.

(b)  Féadfar cibé téarmaí agus coinníollacha (más ann) is cuí leis an gCúirt, maidir le costais a íoc, a chur san ordú lena dtabharfar breith ar iarratas faoin alt seo.

(4)  Beidh feidhm ag Rialacha Cúirte arna ndéanamh i leith alt 27 d'Acht 1976 (a cuireadh isteach le halt 19 d'Acht 1992) maidir le haon mhodhnuithe is gá ar iarratas faoin alt seo.

(5)  (a)  Maidir le hiarratas faoi fho-alt (1) chuig an gCúirt Chuarda, is chuig an mbreitheamh den Chúirt Chuarda don chuaird ina bhfuil an talamh is ábhar don iarratas a dhéanfar é.

(b)  Beidh dlínse ag an gCúirt Chuarda iarratas faoin alt seo a éisteacht agus breith a thabhairt air i gcás nach mó ná £200 luacháil inrátaithe na talún is ábhar don iarratas.

(c)  I gcás gur mó ná £200 luacháil inrátaithe aon talún is ábhar don iarratas faoin alt seo, déanfaidh an Chúirt Chuarda, má dhéanann aon duine a bhfuil leas aige nó aici sna himeachtaí iarratas chuige sin chuici, na himeachtaí a aistriú chuig an Ard-Chúirt, ach is bailí d'aon ordú nó gníomh arna dhéanamh i gcúrsa na n-imeachtaí sin roimh an aistriú mura ndéanfar é a urscaoileadh nó a athrú le hordú ón Ard-Chúirt.

Is cion é mainneachtain fógra faoi alt 88 a chomhlíonadh.

91. —I gcás ina mainneoidh duine ar a seirbheálfar fógra faoi alt 88 ceanglas de chuid an fhógra a chomhlíonadh, nó ina gcuirfidh sé nó sí faoi deara nó ina gceadóidh sé nó sí do dhuine mainneachtain ceanglas den sórt sin a chomhlíonadh, beidh sé nó sí ciontach i gcion.

Ní gá cead a fháil chun aon fhorbairt a cheanglófar faoin gCaibidil seo a dhéanamh.

92. —Gan dochar do Chuid III, ní gá cead a fháil maidir le forbairt a cheanglófar a dhéanamh le fógra faoi alt 88 nó le hordú faoi alt 90.