Uimhir 34 de 1946.

AN tACHT STAIDRIMH (LEASÚ), 1946.

[An tiontó oifigiúil.]

ACHT DO LEASÚ AN ACHTA STAITISTÍOCHTA, 1926 .

[17ú Nollaig, 1946.]

ACHTAÍTEAR AG AN OIREACHTAS MAR LEANAS:—

1. —San Acht seo—

ciallaíonn an abairt “an Príomh-Acht” an tAcht Staitistíochta, 1926 (Uimh. 12 de 1926) ;

ciallaíonn an abairt “údarás Stáit” aon údarás acu seo a leanas:—

(a) Aire Stáit,

(b) Coimisinéirí na nOibreacha Poiblí in Éirinn,

(c) Coimisiún na Talún.

2. —(1) San alt seo folaíonn an abairt “eolas staidrimh”—

(a) lánas nó aon chuid de lánas aon sceidil, foirme nó doiciméide eile áirithe a líon duine ar bith nó a chomhlánaigh sé ar shlí eile de bhun foréilimh arna dhéanamh faoin bPríomh-Acht;

(b) lánas nó aon chuid de lánas aon bhreacacháin nó doiciméide (nach breacachán ná doiciméid atá ar fáil chun a iniúchta ag an bpobal) a ndearna oifigeach staidrimh, i bhfeidhmiú aon chumhachta chuige sin a tugadh dó leis an bPríomh-Acht, é a iniúchadh nó cóip de a dhéanamh nó a fháil; agus

(c) aon eolas nó freagra ó bhéal a tugadh i dtaobh aon duine, gnótha nó gnólachta áirithe.

(2) Más deimhin leis an Aire Tionnscail agus Tráchtála gur gá sin a dhéanamh chun go gcomhlíonfaí go cuí feadhma údaráis Stáit nó coiste, coimisiúin nó bínse fhiosrúcháin arna bhunú ag an Rialtas nó ag údarás Stáit, féadfaidh sé a údarú eolas staidrimh sonraithe a nochtadh do dhaoine sonraithe, is oifigigh don údarás Stáit sin, nó comhaltaí den choiste, den choimisiún nó den bhínse fiosrúcháin sin nó oifigigh dó, do réir mar a bheas, agus air sin beidh éifeacht ag na forála seo a leanas:—

(a) ar aon duine sonraithe den tsórt sin dá iarraidh sin, déanfar, d'ainneoin aon ní in alt 13 den Phríomh-Acht, an t-eolas staidrimh sin a nochtadh dhó;

(b) ní bhainfidh alt 14 den Phríomh-Acht le nochtadh an eolais sin amhlaidh;

(c) má dhéanann duine ar bith, dar nochtadh an t-eolas staidrimh sin de bhun an ailt seo, an t-eolas staidrimh sin nó aon chuid de a fhoilsiú nó é a nochtadh d'aon duine eile, nach duine sonraithe freisin, beidh an duine sin ciontach i gcion faoin alt seo agus ar a chiontú ann ar an slí achomair dlífear fíneáil nach mó ná caoga punt a chur air nó, más rogha leis an gCúirt, príosúntacht ar feadh aon téarma nach sia ná sé mhí nó an fhíneáil sin agus an phríosúntacht sin le chéile.

3. —(1) Féadfar an tAcht Staidrimh (Leasú), 1946 , a ghairm den Acht seo.

(2) Féadfar na hAchta Staidrimh, 1926 agus 1946, a ghairm den Phríomh-Acht agus den Acht seo le chéile.