Uimhir 7 de 1988

AN tACHT LEASA SHÓISIALAIGH, 1988

RIAR NA nALT

CUID I

Réamhráiteach

CUID II

Méaduithe

CUID III

Árachas Sóisialach do Dhaoine Féinfhostaithe

CUID IV

Leasuithe Ilghnéitheacha

SCEIDEAL A

SCEIDEAL B

Uimhir 7 de 1988

AN tACHT LEASA SHÓISIALAIGH, 1988

[An tiontú oifigiúil]

ACHT DO LEASÚ AGUS DO LEATHNÚ NA nACHTANNA LEASA SHÓISIALAIGH, 1981 GO 1987, AGUS AN ACHTA UM SCÉIM RANNÍOCAÍ FOSTAÍOCHTA FOSTÓIRÍ, 1981 .

[30 Márta, 1988]

ACHTAÍTEAR AG AN OIREACHTAS MAR A LEANAS:

CUID I

Réamhráiteach

1. —(1) Féadfar an tAcht Leasa Shóisialaigh, 1988 , a ghairm den Acht seo.

(2) Forléireofar na hAchtanna Leasa Shóisialaigh, 1981 go 1987, agus an tAcht seo (seachas alt 27) mar aon Acht amháin.

(3) Féadfar na hAchtanna Leasa Shóisialaigh, 1981 go 1988, a ghairm de na hAchtanna Leasa Shóisialaigh, 1981 go 1987, agus den Acht seo (seachas alt 27), le chéile.

(4) Féadfar na hAchtanna um Scéim Ranníocaí Fostaíochta Fostóirí, 1981 agus 1988, a ghairm den Acht um Scéim Ranníocaí Fostaíochta Fostóirí, 1981 , agus d'alt 27 den Acht seo, le chéile.

2. —(1) San Acht seo—

ciallaíonn “Acht 1985” an tAcht Leasa Shóisialaigh, 1985 ;

ciallaíonn “Acht 1986” an tAcht Leasa Shóisialaigh, 1986 ;

ciallaíonn “Acht 1987” an tAcht Leasa Shóisialaigh, 1987 ;

tá leis “na hAchtanna Cánach Ioncaim” an bhrí a shanntar dó le halt 3 den Acht Cánach Ioncaim, 1967 ;

ciallaíonn “an Príomh-Acht” an tAcht Leasa Shóisialaigh (Comhdhlúthú), 1981 .

(2) Déanfar na tagairtí san Acht seo d'aon achtachán a fhorléiriú mar thagairtí don achtachán sin arna leasú nó arna leathnú le haon achtachán dá éis sin.

CUID II

Méaduithe

3. —(1) Leasaítear leis seo an Príomh-Acht trí na Codanna atá leagtha amach i Sceideal A a ghabhann leis an Acht seo a chur in ionad Chodanna I go IV (a cuireadh isteach le halt 2 d'Acht 1987) den Dara Sceideal a ghabhann leis an Acht sin.

(2) Tiocfaidh an t-alt seo i ngníomh—

(a) a mhéid a bhaineann sé le sochar dífhostaíochta, an 21ú lá d'Iúil, 1988,

(b) a mhéid a bhaineann sé le sochar míchumais, le liúntas máithreachais, le sochar díobhála, le haisce mhíthreorach agus le pinsean míthreorach, an 25ú lá d'Iúil, 1988,

(c) a mhéid a bhaineann sé le sochar banchéile thréigthe, le pinsean easláine agus le pinsean scoir, an 28ú lá d'Iúil, 1988, agus

(d) a mhéid a bhaineann sé le sochar báis faoi alt 50, 51 nó 52 den Phríomh-Acht, le pinsean seanaoise (ranníocach), le pinsean baintrí (ranníocach) agus le liúntas dílleachta (ranníocach), an 29ú lá d'Iúil, 1988.

4. —(1) Leasaítear leis seo an Príomh-Acht trí na Codanna atá leagtha amach i Sceideal B a ghabhann leis an Acht seo a chur in ionad Chodanna I agus III (a cuireadh isteach le halt 3 d'Acht 1987) den Cheathrú Sceideal a ghabhann leis an Acht sin.

(2) Tiocfaidh an t-alt seo i ngníomh—

(a) a mhéid a bhaineann sé le cúnamh dífhostaíochta, an 20ú lá d'Iúil, 1988,

(b) a mhéid a bhaineann sé le liúntas banchéile thréigthe, le liúntas banchéile príosúnaigh, le liúntas cúnaimh shóisialaigh agus le liúntas do bhean shingil, an 28ú lá d'Iúil, 1988,

(c) a mhéid a bhaineann sé le pinsean seanaoise, le pinsean dall, le pinsean baintrí (neamhranníocach) agus le pinsean dílleachta (neamhranníocach), an 29ú lá d'Iúil, 1988, agus

(d) a mhéid a bhaineann sé le liúntas leasa forlíontach, an 25ú lá d'Iúil, 1988.

5. —(1) Déantar leis seo alt 232B (a cuireadh isteach le halt 13 den Acht Leasa Shóisialaigh, 1984 ) den Phríomh-Acht a leasú—

(a) trí “£108” a chur in ionad “£104” (a cuireadh isteach le halt 4 d'Acht 1987), i mír (a), agus

(b) tríd an mír seo a leanas a chur in ionad mhír (b) (arna leasú leis an alt sin 4):

“(b) i gcás teaghlach a bhfuil níos mó ná aon leanbh amháin ar áireamh ann, £108—

(i) arna mhéadú de £23 in aghaidh gach linbh sa bhreis suas go dtí an cúigiú leanbh agus an cúigiú leanbh a áireamh, nó

(ii) arna mhéadú de cibé méideanna a bheidh forordaithe in aghaidh gach linbh sa bhreis suas go dtí cibé líon leanaí a bheidh forordaithe agus an líon leanaí sin a áireamh.”.

(2) Déantar leis seo alt 232C (2) (a cuireadh isteach le halt 13 den Acht Leasa Shóisialaigh, 1984 ) den Phríomh-Acht a leasú tríd an mír seo a leanas a chur in ionad mhír (b) (arna leasú le halt 4 d'Acht 1987):

“(b) i gcás teaghlach a bhfuil níos mó ná aon leanbh amháin ar áireamh ann, £16—

(i) arna mhéadú de £7 in aghaidh gach linbh sa bhreis suas go dtí an cúigiú leanbh agus an cúigiú leanbh a áireamh, nó

(ii) arna mhéadú de cibé rátaí a bheidh forordaithe in aghaidh gach linbh sa bhreis suas go dtí cibé líon leanaí a bheidh forordaithe agus an líon leanaí sin a áireamh.”.

(3) Bainfidh fo-alt (1) den alt seo le haon éileamh le haghaidh forlíonadh ar ioncam teaghlaigh a fhaightear an 28ú lá d'Iúil, 1988, nó dá éis.

6. —(1) Leasaítear leis seo alt 10 (1) den Phríomh-Acht tríd an mír seo a leanas a chur in ionad mhír (c) (a cuireadh isteach le halt 5 d'Acht 1987):

“(c) I gcás go raibh, i mbliain ranníoca áirithe, suim £16,200 de thuilleamh ináirithe ag ranníocóir fostaithe agus gur íocadh ranníocaí faoi mhír (b) i leith an tuillimh ináirithe sin, ní bheidh aon ranníoc eile den sórt sin iníoctha i leith aon tuillimh ináirithe de chuid an ranníocóra fhostaithe sin an bhliain ranníoca sin.”.

(2) Tiocfaidh an t-alt seo i ngníomh an 6ú lá d'Aibreán, 1988.

7. —(1) Leasaítear leis seo alt 65 den Phríomh-Acht trí “0.5 faoin gcéad” a chur in ionad “0.43 faoin gcéad” (a cuireadh isteach le halt 7 d'Acht 1986), i míreanna (a) (ii) agus (b) d'fho-alt (2).

(2) Tiocfaidh an t-alt seo i ngníomh an 6ú lá d'Aibreán, 1988.

8. —(1) Leasaítear leis seo alt 73 (a cuireadh isteach le halt 7 d'Acht 1987) den Phríomh-Acht trí “£66” a chur in ionad “£62”.

(2) Beidh éifeacht leis an alt seo i ndáil le haon tréimhse bhearnaithe fostaíochta dar tosach an 4ú lá d'Aibreán, 1988, nó dá éis.

9. —Leasaítear leis seo alt 15 (1) den Phríomh-Acht tríd an mír seo a leanas a chur isteach i ndiaidh mhír (c):

“(cc) ús a bheidh dlite ar riaráistí ranníocaí fostaíochta a tharscaoileadh.”.

CUID III

Árachas Sóisialach do Dhaoine Féinfhostaithe

10. —Leasaítear leis seo alt 2 (1) den Phríomh-Acht—

(a) tríd an míniú ar “ranníoc cáilitheach” a scriosadh, agus

(b) trí na mínithe seo a leanas a chur isteach:

“ciallaíonn ‘féinfhostaíocht inárachaithe’ féinfhostaíocht den chineál gur ranníocóir féinfhostaithe duine a bheadh ag gabháil di;

ciallaíonn ‘ranníoc cáilitheach’ an ranníoc fostaíochta nó an ranníoc féinfhostaíochta iomchuí a íocadh nó a d'íocfaí murach alt 10 (1) (c) nó alt 17C (d) nó (e) i leith aon duine árachaithe;

ciallaíonn ‘díolaíochtaí ináirithe’, i ndáil le ranníocóir féinfhostaithe, díolaíochtaí (seachas tuilleamh ináirithe, díolaíochtaí neamhairgid agus cibé díolaíochtaí eile a bheidh forordaithe) lena mbaineann Caibidil IV de Chuid V den Acht Cánach Ioncaim, 1967 , lúide cibé méid den ranníoc inlamháilte dá dtagraítear i rialacháin 59 agus 60 de na Rialacháin Cánach Ioncaim (Fostaíochtaí), 1960 (I.R. Uimh. 28 de 1960 ) (a cuireadh isteach leis na Rialacháin Cánach Ioncaim (Fostaíochtaí), 1972 (I.R. Uimh 260 de 1972)) a asbhainfear tráth íoctha na ndíolaíochtaí sin;

ciallaíonn ‘ioncam ináirithe”, i ndáil le ranníocóir féinfhostaithe, an t-ioncam comhiomlán (gan tuilleamh ináirithe, díolaíochtaí ináirithe, ioncam neamhairgid agus cibé ioncam eile a bheidh forordaithe a áireamh), ó gach bunadh in aghaidh na bliana ranníoca arna mheas de réir fhorálacha na nAchtanna Cánach Ioncaim, ach gan féachaint d'alt 2 nó d'alt 18 den Acht Airgeadais, 1969 , nó (ach amháin i gcás duine lena mbaineann mír 1 de Chuid IIA den Chéad Sceideal) do Chaibidil 1 (a cuireadh isteach leis an Acht Airgeadais, 1980 ) de Chuid IX den Acht Cánach Ioncaim, 1967 , tar éis cibé méid d'aon asbhaint a bhaint as an ioncam is asbhaint a lamháiltear de bhua na bhforálacha dá dtagraítear in alt 33 den Acht Airgeadais, 1975 , atá le hasbhaint ón ioncam sin nó le fritháireamh ina aghaidh agus é á mhuirearú maidir le cáin ioncaim;

tá le ‘ranníocóir féinfhostaithe’ an bhrí a shanntar dó in alt 17A;

tá le ‘ranníoc féinfhostaíochta’ an bhrí a shanntar dó in alt 17B.”.

11. —Leasaítear leis seo an Príomh-Acht tríd an gCaibidil seo a leanas a chur isteach i gCuid II tar éis Chaibidil 1:

12. —Leasaítear leis seo an Chéad Sceideal a ghabhann leis an bPríomh-Acht tríd an gCuid seo a leanas a chur isteach i ndiaidh Chuid II:

“CUID IIA

RANNÍOCÓIRÍ FÉINFHOSTAITHE EISCTHE

1. Gaol forordaithe leis an ranníocóir féinfhostaithe nach comhpháirtí é, i gcás go mbeidh sé páirteach i ngnó an ranníocóra fhéinfhostaithe agus go ndéanfaidh sé na tascanna céanna nó tascanna foghabhálacha.

2. Ranníocóir féinfhostaithe atá, de bhua fhorálacha ailt 137 agus 138, ag fáil cúnaimh dhífhostaíochta.

3. Duine a mbeidh comhiomlán a ioncaim ináirithe, a dhíolaíochtaí ináirithe nó a thuillimh ináirithe (más ann) go huile, sula n-asbhainfear an oiread sin d'aon asbhaint—

(a) a lamháiltear de bhua na bhforálacha dá dtagraítear in alt 33 den Acht Airgeadais, 1975 , a asbhaint nó a fhritháireamh in aghaidh ioncaim agus é á mhuirearú i leith cánach ioncaim, nó

(b) a lamháiltear de réir rialacháin 59 agus 60 de na Rialacháin Cánach Ioncaim (Fostaíochtaí), 1960 (I.R. Uimh. 28 de 1960 ) (a cuireadh isteach leis na Rialacháin Cánach Ioncaim (Fostaíochtaí), 1972 (I.R. Uimh. 260 de 1972)), a asbhaint ar dhíolaíochtaí nó tuilleamh a íoc,

faoi bhun méid forordaithe.

4. Ranníocóir fostaithe nó duine a bheidh ag fáil pinsin a thig as fostaíocht roimhe sin agus i gcás ceachtar acu nach mbeidh ioncam lena mbaineann Caibidil II nó III de Chuid IV den Acht Cánach Ioncaim, 1967 , ar áireamh san ioncam ináirithe don bhliain ranníoca.

5. Duine a bheidh fostaithe in aon fhostaíocht nó in aon fhostaíochtaí a shonraítear i Rialacháin faoi alt 7, ar fostaíochtaí iad nach n-áirítear na ranníocaí is iníoctha maidir leo faoi na Rialacháin sin ach amháin i ndáil le pinsean baintrí (ranníocach), sochar banchéile thréigthe no liúntas dílleachta (ranníocach) a dheonú agus nach n-áirítear iad i ndáil le haon sochar eile a dheonú.”.

13. —Leasaítear leis seo an Príomh-Acht tríd an alt seo a leanas a chur isteach i ndiaidh alt 78:

“78A. Chun críocha na Caibidle seo i gcás duine a thiocfaidh chun bheith ina ranníocóir féinfhostaithe an 6 Aibreán, 1988, agus ar ranníocóir fostaithe é tráth ar bith roimh an dáta sin measfar gurb é an dáta ar tháinig sé faoi árachas den chéad uair nó an 6 Aibreán, 1988, cibé acu is fabhraí dó, an dáta ar tháinig sé faoi árachas:

Ar choinníoll má mheastar amhlaidh faoi dháta seachas an dáta ar tháinig an t-éilitheoir faoi árachas den chéad uair, go measfar gurb é an dáta sin an dáta ar tháinig sé faoi árachas chun críocha mhíreanna (a) agus (c) d'alt 79 (1).”.

14. —Leasaítear leis seo an Príomh-Acht tríd an alt seo a leanas a chur isteach i ndiaidh alt 93:

“93A. Chun críocha alt 93 (1) (b) i gcás duine a thiocfaidh chun bheith ina ranníocóir féinfhostaithe an 6 Aibreán, 1988, agus ar ranníocóir fostaithe é tráth ar bith roimh an dáta sin measfar gurb é an dáta ar tháinig sé faoi árachas den chéad uair nó an 6 Aibreán, 1988, cibé acu is fabhraí dó, an dáta ar tháinig sé faoi árachas.

15. —Aon cheist—

(a) i dtaobh cibé acu atá nó a bhí fostaíocht ina féinfhostaíocht inárachaithe,

(b) i dtaobh cibé acu atá nó a bhí duine i bhféinfhostaíocht inárachaithe, nó

(c) i dtaobh an ráta ranníoca féinfhostaíochta is iníoctha nó ab iníoctha ag ranníocóir féinfhostaithe,

is oifigeach breithiúnachta a chinnfidh í de réir Chuid VIII den Phríomh-Acht.

16. —(1) Féadfaidh an tAire le rialacháin aon fhorálacha den Phríomh-Acht a mbeidh feidhm acu maidir le ranníocóirí fostaithe nó le ranníocaí fostaíochta a chur chun feidhme (fara nó d'éagmais modhnaithe) maidir le ranníocóirí féinfhostaithe agus ranníocaí féinfhostaíochta is iníoctha faoi mhír (a), (b) nó (c) d'alt 17C den Phríomh-Acht.

(2) Féadfar a fhoráil le rialacháin go ndéanfar coigeartuithe nuair a bheidh méideanna is iníoctha i leith ranníocaí féinfhostaíochta á ríomh chun áireamh a éascú agus chun méideanna nach mó ná 5p a dhíchur as ranníocaí féinfhostaíochta agus chun méideanna is mó ná 5p ach is lú ná 10p a chothromú suas go dtí 10p.

17. —Beidh an méid seo a leanas faoi réir cheadú an Aire Airgeadais—

(a) rialacháin chun críocha ailt 10, 17D agus 17F den Phríomh-Acht agus mhíreanna 1 agus 3 de Chuid IIA den Dara Sceideal a ghabhann leis an bPríomh-Acht agus alt 16 (1) den Acht seo,

(b) dréacht de rialacháin arna ndéanamh faoi ailt 17A (4), 17C (h) agus 17E den Phríomh-Acht.

18. —(1) Más rud é in aon chás go mbainfidh aon deacracht leis an gCuid seo a thabhairt i ngníomh féadfaidh an tAire, le toiliú an Aire Airgeadais, aon ní a dhéanamh le hordú a dhealraítear a bheith riachtanach nó fóirsteanach chun an Chuid seo a thabhairt i ngníomh agus féadfar forálacha na Coda seo a mhodhnú le haon ordú den sórt sin a mhéid a dhealraítear a bheith riachtanach nó fóirsteanach chun éifeacht a thabhairt don ordú.

(2) Gach ordú a dhéanfaidh an tAire faoin alt seo leagfar é faoi bhráid gach Tí den Oireachtas a luaithe is féidir tar éis a dhéanta agus má dhéanann ceachtar Teach den Oireachtas laistigh den lá is fiche a shuífidh an Teach sin tar éis an t-ordú a leagan faoina bhráid rún a rith ag neamhniú an ordaithe sin, beidh an t-ordú sin ar neamhní dá réir sin ach sin gan dochar do bhailíocht aon ní a rinneadh roimhe sin faoin ordú sin.

(3) Ní fhéadfar aon ordú a dhéanamh faoin alt seo ar bhliain amháin a bheith caite tar éis thosach feidhme an ailt seo.

CUID IV

Leasuithe Ilghnéitheacha

19. —I gcás—

(a) go gcúiseofar duine i gcion i ndáil le haon sochar, pinsean, cúnamh nó liúntas a fháil faoin bPríomh-Acht nó faoi rialacháin arna ndéanamh faoi réim nó d'fheidhmiú fhorálacha an Phríomh-Achta, agus

(b) go mbeartóidh an chúirt ordú a dhéanamh faoi alt 1 (1) den Probation of Offenders Act, 1907,

ní dhéanfaidh an chúirt an t-ordú sin go dtí gur deimhin léi go mbeidh aon mhéideanna aisíoctha a dhlífear a aisíoc i leith an tsochair, an phinsin, an chúnaimh nó an liúntais sin.

20. —(1) Ní dhéanfar imeachtaí i leith ciona faoin bPríomh-Acht nó faoi rialacháin arna ndéanamh faoi réim nó d'fheidhmiú fhorálacha an Phríomh-Achta, a thionscnamh ach amháin ag an Aire nó le toiliú an Aire nó ag oifigeach a bheidh údaraithe chuige sin le treoracha speisialta nó ginearálta ón Aire.

(2) Féadfar ionchúiseamh i leith ciona achomair faoin bPríomh-Acht nó faoi rialacháin arna ndéanamh faoi réim nó d'fheidhmiú fhorálacha an Phríomh-Achta a thionscnamh ar agra an Aire.

(3) D'ainneoin fhorálacha fho-alt (1) den alt seo nó aon fhoráil in aon achtachán a shonraíonn an tréimhse ar féidir imeachtaí a thionscnamh lena linn, féadfar ionchúiseamh i leith ciona achomair faoin bPríomh-Acht no faoi rialacháin arna ndéanamh faoi réim nó d'fheidhmiú fhorálacha an Phríomh-Achta a thionscnamh tráth ar bith laistigh de cibé tréimhse díobh seo a leanas is deireanaí a rachaidh in éag—

(a) an tréimhse sé mhí dar tosach an dáta ar tháinig leorfhianaise i seilbh an Aire le gur chóir an t-ionchúiseamh sin a thionscnamh, nó

(b) an tréimhse dhá bhliain dar tosach an dáta a rinneadh an cion.

(4) Chun críocha fho-alt (3) den alt seo, is leorfhianaise, go dtí go suífear a mhalairt, maidir leis an dáta ar tháinig an fhianaise sin a dúradh i seilbh an Aire, deimhniú arna shéalú le séala oifigiúil an Aire ag lua an dáta sin.

(5) Má tharlaíonn in ionchúiseamh i leith ciona faoin bPríomh-Acht nó faoi rialacháin arna ndéanamh faoi réim nó d'fheidhmiú fhorálacha an Phríomh-Achta, go suífear chun sástacht na cúirte—

(a) go ndearna duine (dá ngairtear an cosantóir san alt seo) iarratas ar aon sochar, cúnamh, liúntas nó forlíonadh faoi Chodanna II, III, IV nó IVA den Phríomh-Acht, agus

(b) go ndearnadh de thoradh an iarratais sin aon sochar, cúnamh, liúntas nó forlíonadh den sórt sin a íoc le haon duine (cibé acu arbh é an sochar, an cúnamh, an liúntas nó an forlíonadh sin a iarradh nó nárbh é agus cibé acu ar leis an gcosantóir nó nár leis a íocadh é),

toimhdeofar gur thug an cosantóir aon fhaisnéis a bheidh san iarratas (nó gur chuir sé faoi deara í a thabhairt thar a cheann) agus, i gcás gur faisnéis bhréagach an fhaisnéis sin, gurbh eol dó go hiomlán gurbh fhaisnéis bhréagach í agus gur thug sé í le hintinn go meabhlódh sí; ach féadfar an toimhde sin a fhrisnéis.

(6) Chun imeachtaí a thionscnamh faoin bPríomh-Acht, deimhniú a airbheartaíonn a bheith tugtha ag oifigeach don Aire a bheidh údaraithe chuige sin ag an Aire agus a bheith sínithe ag an oifigeach sin, lena ndeimhnítear na fíorais seo a leanas, eadhon, gur oifigeach don Aire duine agus go bhfuil sé údaraithe faoi threoir speisialta nó ginearálta ón Aire na himeachtaí sin a thionscnamh, nó gur thoiligh an tAire le tionscnamh na n-imeachtaí sin, beidh sé ina leorfhianaise in aon imeachtaí dlíthiúla ar na nithe a dheimhnítear sa deimhniú go dtí go suífear a mhalairt.

(7) In aon imeachtaí i leith ciona faoi Chuid II, nó faoi Chaibidil 2 de Chuid III, den Phríomh-Acht nó faoi rialacháin arna ndéanamh faoi réim nó d'fheidhmiú na bhforálacha sin, beidh banchéile nó fearchéile an duine a cúisíodh sa chion, inniúil d'ainneoin aon achtacháin eile ar fhianaise a thabhairt, cibé acu ar son nó in aghaidh an duine sin, ach ní inordaithe don bhanchéile ná don fhearchéile fianaise a thabhairt ná, le linn fianaise a thabhairt, aon eolas a nochtadh a thug an duine sin di nó dó, de réir mar a bheidh, le linn an phósta.

(8) Aisghairtear leis seo na forálacha seo a leanas:

(a) sa Phríomh-Acht—

(i) alt 116,

(ii) alt 145,

(iii) alt 168,

(iv) fo-ailt (4) agus (5) d'alt 188, agus

(v) fo-ailt (4) agus (5) d'alt 231;

(b) in Acht 1986, alt 20.

21. —Duine a chiontófar ar díotáil i gcion dá bhforáiltear fíneáil nó téarma príosúnachta in aon alt den Phríomh-Acht a shonraítear sa Tábla a ghabhann leis an alt seo dlífear—

(a) in ionad na fíneála a fhoráiltear don chiontú sin in aon alt den sórt sin, fíneáil nach mó ná £10,000, nó

(b) in ionad an téarma príosúnachta a fhoráiltear don chiontú sin in aon alt den sórt sin, téarma príosúnachta nach faide ná trí bliana,

nó an fhíneáil sin agus an phríosúnacht sin le chéile, a chur air.

22. —Leasaítear leis seo an Príomh-Acht—

(a) trí “£1,000” a chur in ionad “£500” (a cuireadh isteach le halt 12 d'Acht 1985), in alt 185 (3), agus

(b) trí “£500” a chur in ionad “£100” in alt 298 (10).

23. —(1) Leasaítear leis seo alt 22 (a bhaineann le ré na híocaíochta i gcás sochair mhíchumais) den Phríomh-Acht tríd an mír seo a leanas a chur in ionad mhír (b) d'fho-alt (1):

“(b) roimh an lá sin go raibh teideal ag an duine sin, i leith aon tréimhse bearnaithe fostaíochta (cibé acu is cuid de an lá sin nó nach ea) le linn na tréimhse dar tosach an dáta sé bliana roimh an 5ú lá d'Aibreán díreach roimh an mbliain sochair ina dtarlaíonn an lá sin, agus dar críoch an lá sin, chun sochair mhíchumais in aghaidh 312 lá,”.

(2) Bainfidh an t-alt seo le haon éileamh ar shochar míchumais a fhaightear an 6ú lá d'Aibreán, 1988, nó dá éis.

24. —(1) Leasaítear leis seo alt 42 den Phríomh-Acht (a bhaineann le teideal chun sochair dhíobhála) tríd an bhfo-alt seo a leanas a chur in ionad fho-alt (5):

“(5) Is é an méid is iníoctha mar shochar díobhála in aghaidh aon lae áirithe éagumais an séú cuid den ráta seachtainiúil iomchuí faoi réir an choinníll go ndéanfar an méid iomlán a bheidh á íoc tráth ar bith de bhua an fho-ailt seo a chothromú suas go dtí an 10p is gaire i gcás gur iolraí ar 5p é ach nach iolraí freisin ar 10p é agus a chothromú go dtí an 10p is gaire i gcás nach iolraí ar 5p ná 10p é.”.

(2) Leasaítear leis seo alt 150 den Phríomh-Acht (a bhaineann le cúnamh dífhostaíochta a íoc) tríd an bhfo-alt seo a leanas a chur isteach i ndiaidh fho-alt (2):

“(3) Is é an méid is iníoctha mar chúnamh dífhostaíochta in aghaidh aon lae dífhostaíochta an séú cuid den ráta seachtainiúil iomchuí faoi réir an choinníll go ndéanfar an méid iomlán a bheidh á íoc tráth ar bith de bhua an fho-ailt seo a chothromú suas go dtí an 10p is gaire is gcás gur iolraí ar 5p é ach nach iolraí freisin ar 10p é agus a chothromú go dtí an 10p is gaire i gcás nach iolraí ar 5p ná 10p é.”.

(3)   (a) Tiocfaidh fo-alt (1) den alt seo i ngníomh an 25ú lá d'Iúil, 1988, agus

(b) tiocfaidh fo-alt (2) den alt seo i ngníomh an 20ú lá d'Iúil, 1988.

25. —(1) Leasaítear leis seo alt 140 den Phríomh-Acht (a bhaineann le héifeacht acmhainne ar rátaí a mbeidh cúnamh dífhostaíochta iníoctha dá réir) tríd an mír seo a leanas a chur in ionad mhír (b) d'fho-alt (1):

“(b) má bhíonn acmhainn aige, de réir ráta is ionann agus an ráta sceidealta arna laghdú 10p sa tseachtain in aghaidh gach 10p nó cuid de 10p dá acmhainn.”.

(2) Leasaítear leis seo alt 12 den Acht Leasa Shóisialaigh (Uimh. 2), 1985 (a bhaineann le lánúineacha pósta a bheith i dteideal cúnaimh dhífhostaíochta) tríd an bhfo-alt seo a leanas a chur in ionad fho-alt (2):

“(2) I gcás nach cleithiúnaí aosaithe céile iarratasóra ar chúnamh dífhostaíochta, is de réir ráta is ionann agus an ráta sceidealta arna laghdú 10p in aghaidh gach 20p nó cuid de 20p dá chuid acmhainne a bheidh cúnamh dífhostaíochta iníoctha leis an iarratasóir.”.

(3) Tiocfaidh an t-alt seo i ngníomh an 20ú lá d'Iúil, 1988.

26. —(1) Aisghairtear leis seo ailt 153 (a bhaineann le híocaíochtaí leis an Aire ó údaráis áitiúla) agus 154 (a bhaineann le deimhnithe luachála) den Phríomh-Acht.

(2) Tiocfaidh an t-alt seo i ngníomh an 1ú lá d'Eanáir, 1989.

27. —Leasaítear leis seo an tAcht um Scéim Ranníocaí Fostaíochta Fostóirí, 1981 —

(a) tríd an alt seo a leanas a chur in ionad alt 4:

“4. Aistreofar an t-airgead a bheidh chun creidmheas na scéime go dtí cuntas Chiste na nDíobhálacha Ceirde lena mbaineann alt 67 den Acht Leasa Shóisialaigh (Comhdhlúthú), 1981 .”, agus

(b) tríd an bhfo-alt seo a leanas a chur in ionad fho-alt (6) d'alt 6:

“(6) Íocfaidh na Coimisinéirí Ioncaim leis an Aire Leasa Shóisialaigh an t-airgead go léir a bheidh íoctha i leith an ranníoca fostaíochta fostóra agus aistreoidh an tAire sin é go dtí cuntas Chiste na nDíobhálacha Ceirde dá dtagraítear in alt 4 den Acht seo.”.

28. —(1) Leasaítear leis seo an Príomh-Acht—

(a) tríd an mír bhreise seo a leanas a chur isteach i bhfo-alt (1) d'alt 134 (a bhaineann leis an gcineál cúnaimh):

“(k) liúntas réamhscoir.”,

(b) tríd an gCaibidil seo a leanas a chur isteach i gCuid III i ndiaidh Chaibidil 2:

(2) Tiocfaidh an t-alt seo i ngníomh cibé lá a cheapfaidh an tAire le hordú.

29. —Leasaítear leis seo alt 38 den Phríomh-Acht—

(a) tríd an mír seo a leanas a chur in ionad mhír (f) d'fho-alt (3):

“(f) fostaíocht, ar shlí seachas faoi chonradh seirbhíse, a shonraítear i mír 12 de Chuid I den Chéad Sceideal.”,

agus

(b) tríd an bhfo-alt seo a leanas a chur in ionad fho-alt (11) (a cuireadh isteach le halt 16 den Acht Leasa Shóisialaigh, 1983 ):

“(11) Le linn do dhuine atá dífhostaithe a bheith ag freastal ar chúrsa oiliúna a sholáthraigh nó a cheadaigh An Foras Áiseanna Saothair, An Chomhairle Oiliúna Talmhaíochta nó An Chomhairle um Oideachas, Earcaíocht agus Oiliúint, Teoranta, measfar chun críocha na Coda seo é a bheith i bhfostaíocht inárachaithe (díobhálacha ceirde) agus é a bheith fostaithe ag an bhForas Áiseanna Saothair, ag an gComhairle Oiliúna Talmhaíochta nó ag an gComhairle um Oideachas, Earcaíocht agus Oiliúint, Teoranta (de réir mar a bheidh).”.

30. —Leasaítear leis seo an Príomh-Acht—

(a) trí na fo-ailt seo a leanas a chur isteach i ndiaidh fho-alt (11) d'alt 79 (a bhaineann leis na coinníollacha chun pinsin seanaoise (ranníocach) a fháil):

“(12) Faoi réir fho-alt (13), féadfar a fhoráil le rialacháin, faoi réir cheadú an Aire Airgeadais, go mbeidh teideal chun pinsin seanaoise (ranníocach) ag duine a mbeadh an teideal sin aige mura mbeadh nach bhfuil an coinníoll ranníoca atá leagtha amach i bhfo-alt (1) (c) comhlíonta i gcás gur tháinig an duine sin, tar éis dó scor roimhe sin de bheith ina ranníocóir fostaithe, chun bheith ina ranníocóir fostaithe de dhroim alt 12 den Acht Leasa Shóisialaigh, 1973 , a theacht i ngníomh.

(13) Forálfar le rialacháin chun críocha fho-alt (12) go mbeidh pinsean seanaoise (ranníocach) is iníoctha de bhua na rialachán sin iníoctha de réir ráta is lú ná an ráta a shonraítear sa Dara Sceideal, agus féadfar an ráta a shonrófar leis na rialacháin a athrú de réir an méid a bheidh an coinníoll ranníoca atá leagtha amach i bhfo-alt (1) (c) comhlíonta.”,

(b) trí na fo-ailt seo a leanas a chur isteach i ndiaidh fho-alt (9) d'alt 93 (a bhaineann leis na coinníollacha chun pinsean baintrí (ranníocach) a fháil):

“(10) Faoi réir fho-alt (11), féadfar a fhoráil le rialacháin, faoi réir cheadú an Aire Airgeadais, go mbeidh teideal chun pinsin baintrí (ranníocach) ag duine a mbeadh an teideal sin aige mura mbeadh nach bhfuil an coinníoll ranníoca atá leagtha amach i bhfo-alt (1) (b) comhlíonta faoi threoir taifid árachais duine i gcás gur tháinig an duine sin, tar éis dó scor roimhe sin de bheith ina ranníocóir fostaithe, chun bheith ina ranníocóir fostaithe de dhroim alt 12 den Acht Leasa Shóisialaigh, 1973 , a theacht i ngníomh.

(11) Forálfar le rialacháin chun críocha fho-alt (10) go mbeidh pinsean baintrí (ranníocach) is iníoctha de bhua na rialachán sin iníoctha de réir ráta is lú ná an ráta a shonraítear sa Dara Sceideal agus féadfar an ráta a shonrófar leis na rialacháin a athrú de réir an méid a bheidh an coinníoll ranníoca atá leagtha amach i bhfo-alt (1) (b) comhlíonta.”, agus

(c) trí na fo-ailt seo a leanas a chur isteach i ndiaidh fho-alt (8) d'alt 101 (a bhaineann leis an gcoinníoll chun sochar banchéile thréigthe a fháil):

“(9) Faoi réir fho-alt (10), féadfar a fhoráil le rialacháin, faoi réir cheadú an Aire Airgeadais, go mbeidh teideal chun sochair banchéile thréigthe ag duine a mbeadh an teideal sin aige mura mbeadh nach bhfuil an coinníoll ranníoca atá leagtha amach i bhfo-alt (1) (b) comhlíonta faoi threoir taifid árachais duine i gcás gur tháinig an duine sin, tar éis dó scor roimhe sin de bheith ina ranníocóir fostaithe, chun bheith ina ranníocóir fostaithe de dhroim alt 12 den Acht Leasa Shóisialaigh, 1973 , a theacht i ngníomh.

(10) Forálfar le rialacháin chun críocha fho-alt (9) go mbeidh sochar banchéile thréigthe is iníoctha de bhua na rialachán sin iníoctha de réir ráta is lú ná an ráta a shonraítear sa Dara Sceideal agus féadfar an ráta a shonrófar leis na rialacháin a athrú de réir an méid a bheidh an coinníoll ranníoca atá leagtha amach i bhfo-alt (1) (b) (ii) comhlíonta.”.

31. —(1) D'ainneoin aon ní dá bhfuil in aon achtachán, féadfaidh an tAire faisnéis atá aige chun críocha an Phríomh-Achta (lena n-áirítear bailiú ranníocaí fostaíochta agus féinfhostaíochta ag na Coimisinéirí Ioncaim) a aistriú go dtí na Coimisinéirí Ioncaim, agus féadfaidh na Coimisinéirí Ioncaim faisnéis atá acu chun críocha an Phríomh-Achta nó na nAchtanna Cánach Ioncaim, a bhaineann le fostóirí, le tuilleamh ináirithe ranníocóirí fostaithe nó le hioncam ináirithe nó díolaíochtaí ináirithe ranníocóirí féinfhostaithe nó le haon íocaíochtaí arna ndéanamh faoin bPríomh-Acht, a aistriú go dtí an tAire.

(2) D'ainneoin aon ní dá bhfuil in aon achtachán, féadfaidh an tAire faisnéis atá aige chun críocha an Phríomh-Achta nó chun scéimeanna a rialú a riarann an tAire nó an Roinn Leasa Shóisialaigh nó a riartar thar a gceann, a aistriú go dtí Aire eile den Rialtas nó go dtí comhlacht sonraithe agus aon fhaisnéis atá ag Aire eile den Rialtas nó ag comhlacht sonraithe agus is gá chun na gcríoch sin nó chun aon scéim den sórt sin a rialú a riarann Aire eile den Rialtas nó comhlacht sonraithe, féadfaidh an tAire sin den Rialtas nó an comhlacht corpraithe an fhaisnéis sin a aistriú go dtí an tAire.

(3) I bhfo-alt (2) den alt seo ciallaíonn “comhlacht sonraithe” údarás áitiúil (chun críocha an Achta Rialtais Áitiúil, 1941 ), bord sláinte, an Garda Síochána nó aon chomhlacht eile arna bhunú—

(a) le haon achtachán nó faoi aon achtachán (seachas Achtanna na gCuideachtaí, 1963 go 1986), nó

(b) faoi Achtanna na gCuideachtaí, 1963 go 1986, de bhun cumhachtaí a thugtar le haon achtachán eile nó faoi aon achtachán eile,

agus a mhaoinítear go hiomlán nó go páirteach le hairgead a chuireann Aire den Rialtas ar fáil nó le hiasachtaí a dhéanann nó a ráthaíonn sé nó le heisiúint scaireanna a shealbhaíonn Aire den Rialtas nó a shealbhaítear thar a cheann agus fochomhlacht d'aon chomhlacht den sórt sin.

SCEIDEAL A

Alt 3.

“An Dara Sceideal

Na Rátaí Sochar

CUID I

Na Rátaí Sochar Tréimhsiúil agus na Méaduithe Orthu

CUID II

Sochair Dhíobhálacha Ceirde — Aiscí agus Deontas

CUID III

Pinsean Míthreorach

CUID IV

Méaduithe ar Phinsean Míthreorach

”.

SCEIDEAL B

Alt 4.

“An Ceathrú Sceideal

Na Rátaí Cúnaimh

CUID I

Na Rátaí Cúnaimh Shóisialaigh Thréimhsiúil agus na Méaduithe Orthu

CUID III

An Méadú ar Phinsean Seanaoise i leith Céile