Uimhir 9 de 1959.
ACHT TOGHCHÁN AN UACHTARÁIN (FORÁLACHA SEALADACHA), 1959.
[An tiontó oifigiúil.]
Léiriú.
1.—San Acht seo—
ciallaíonn “an príomh-alt” alt 34 d'Acht Toghcháin an Uachtaráin, 1937;
ciallaíonn “an toghchán uachtaráin, 1959” an toghchán uachtaráin a bheidh ann sa bhliain 1959;
ciallaíonn “reifreann 1959” an reifreann i ndáil leis an mBiile um an Tríú Leasú ar an mBunreacht, 1958.
An príomh-alt a leasú i ndáil leis an toghchán uachtaráin, 1959.
2.—(1) Nuair a bheidh feidhm á thabhairt don phríomh-alt maidir leis an toghchán uachtaráin, 1959, déanfar an tagairt i bhfo-alt (1) den chéanna do scríbhinn nach mbaineann ach leis an toghchán sin amháin a fhorléiriú mar thagairt do scríbhinn nach mbaineann ach leis an toghchán sin amháin nó a bhaineann leis an toghchán sin agus le reifreann 1959.
(2) I gcás ina mbeidh, de bhun na Rialachán um Postas in Aisce i leith Toghchán an Uachtaráin, 1959, dearbhú le déanamh i ndeimhniú faoi na Rialacháin sin maidir le scríbhinní dá dtagartar i bhfo-alt (1) den alt seo agus a bhaineann leis an toghchán uachtaráin, 1959 agus le reifreann 1959, féadfar an dearbhú a dhéanamh, a shíniú agus a ghlacadh ionann is nach mbaineann na scríbhinní ach leis an toghchán uachtaráin, 1959 amháin.
(3) Aon ní a rinneadh tráth ar bith sular ritheadh an tAcht seo agus a bheadh ceart dá mbeadh an tAcht seo i ngníomh san am, beidh sé, agus measfar go raibh sé ariamh, ceart.
Gearrtheideal.
3.—Féadfar Acht Toghchán an Uachtaráin (Forálacha Sealadacha), 1959, a ghairm den Acht seo.