Uimhir 5 de 1965.
AN tACHT UM AN BRITISH & IRISH STEAM PACKET COMPANY LIMITED (FÁIL), 1965
[An tiontú oifigiúil]
ACHTAÍTEAR AG AN OIREACHTAS MAR A LEANAS:—
Mínithe.
1.—San Acht seo—
ciallaíonn “an comhaontú” an comhaontú a bhfuil cóip de leagtha amach sa Sceideal a ghabhann leis an Acht seo;
ciallaíonn “an Chuideachta” an British & Irish Steam Packet Company Limited;
ciallaíonn “an tAire” an tAire Iompair agus Cumhachta.
An comhaontú a fhormheas agus a fhorálacha a chur i gcrích.
2.—Tugtar formheas leis seo ar an gcomhaontú agus féadfaidh an tAire Airgeadais agus an tAire an comhaontú a chur i gcrích sa mhéid go bhfuil a fhorálacha le comhlíonadh acu.
Airgead a sholáthar as an bPríomh-Chiste le haghaidh íocaíochtaí faoin Acht.
3.—(1) Airleacfar as an bPríomh-Chiste nó a thoradh fáis an t-airgead go léir a theastóidh ón Aire Airgeadais chun gnáthscaireanna eisithe na Cuideachta a cheannach de bhun an chomhaontaithe agus chun íoctha an úis (a fhéadfaidh an tAire Airgeadais a íoc le Coast Lines Limited i leith an airgid cheannaigh is iníoctha ag an Aire Airgeadais leis an gCuideachta sin faoin gcomhaontú ar na scaireanna réamhráite go feadh cibé méid agus ar cibé ráta a mheasfaidh an tAire sin is iomchuí ón dara lá d'Fheabhra, 1965, go dtí an dáta a íocfar an t-airgead ceannaigh réamhráite le Coast Lines Limited).
(2) Féadfaidh an tAire Airgeadais, chun soláthar a dhéanamh le haghaidh airleacan suimeanna as an bPríomh-Chiste faoin alt seo, aon suimeanna is gá chuige sin a fháil ar iasacht ar urrús an Phríomh-Chiste nó a thoradh fáis, agus chun na suimeanna sin a fháil ar iasacht, féadfaidh sé urrúis a bhunú agus a eisiúint agus iad faoi cibé ráta úis, agus faoi réir cibé coinníollacha i dtaobh aisíoca, fuascailte nó eile, is cuí leis, agus íocfaidh sé isteach sa Státchiste an t-airgead go léir a gheofar ar iasacht amhlaidh.
(3) Muirearófar ar an bPríomh-Chiste nó ar a thoradh fáis príomhshuim agus ús gach urrús a eiseofar faoin alt seo agus na costais faoina rachfar i ndáil leis na hurrúis sin a eisiúint.
Sealbhú scaireanna sa Chuideachta ag an Aire Airgeadais.
4.—(1) Féadfaidh an tAire Airgeadais na scaireanna a bheidh faighte aige faoin Acht seo sa Chuideachta a shealbhú fad is cuí leis é agus, tar éis dó dul i gcomhairle leis an Aire, féadfaidh sé, mar is oiriúnach leis agus nuair is oiriúnach leis é, na scaireanna sin go léir nó aon chuid díobh a dhíol nó iad a dhiúscairt ar dhóigh eile.
(2) Íocfar isteach sa Státchiste nó cuirfear chun tairbhe don Státchiste an fáltas glan a gheobhaidh an tAire Airgeadais as scaireanna sa Chuideachta a dhíol.
Feidhmiú cirt nó cumhachta is infheidhmithe ag sealbhóir scaireanna sa Chuideachta ag an Aire Airgeadais.
5.—Féadfaidh an tAire Airgeadais feidhmiú a dhéanamh, i leith na scaireanna a shealbhóidh sé sa Chuideachta ar na cearta agus na cumhachtaí go léir is infheidhmithe ag sealbhóir scaireanna den sórt sin agus, más trí aturnae atá ceart nó cumhacht infheidhmithe, féadfaidh sé an céanna a fheidhmiú trína aturnae.
Díbhinní, etc., a íoc isteach sa Státchiste.
6.—Íocfar isteach sa Státchiste nó cuirfear chun tairbhe don Státchiste na díbhinní agus an t-airgead eile go léir a gheobhaidh an tAire Airgeadais i leith scaireanna sa Chuideachta.
Srian le scaireanna sa Chuideachta a eisiúint.
7.—Ní eiseoidh an Chuideachta scaireanna sa Chuideachta gan toiliú an Aire Airgeadais arna thabhairt tar éis dó dul i gcomhairle leis an Aire.
Stiúrthóirí na Cuideachta.
8.—(1) Is é líon stiúrthóirí a bheidh ar an gCuideachta cibé líon, nach mó ná seachtar, a chinnfidh an tAire ó am go ham, le toiliú an Aire Airgeadais, agus ceapfar iad ag an Aire (agus aigesean amháin) i scríbhinn le toiliú an Aire Airgeadais.
(2) Beidh stiúrthóir ar an gCuideachta i seilbh oifige go ceann cibé téarma a shonróidh an tAire, le toiliú an Aire Airgeadais, i ndoiciméad a cheaptha.
(3) Féadfar stiúrthóir ar an gCuideachta a athcheapadh ina stiúrthóir.
(4) Féadfaidh an tAire, le toiliú an Aire Airgeadais, stiúrthóir ar an gCuideachta a chur as oifig tráth ar bith.
(5) Is é an tAire, le toiliú an Aire Airgeadais, a chinnfidh ó am go ham luach saothair stiúrthóirí na Cuideachta.
(6) Ní gá do stiúrthóir ar an gCuideachta aon scaireanna a bheith aige sa Chuideachta.
(7) (a) Gach stiúrthóir ar an gCuideachta a ceapadh de bhun an chomhaontaithe, measfar, i dtosach feidhme na míre seo, é a bheith tar éis scaradh lena oifig mar stiúrthóir agus athcheapfar é don oifig sin faoi réim agus faoi réir forálacha an ailt seo.
(b) Tiocfaidh mír (a) den fho-alt seo i ngníomh an lú lá d'Aibreán, 1965.
(8) Is é is córam do chruinniú de stiúrthóirí na Cuideachta—
(a) i gcás seachtar stiúrthóir a bheith uirthi, triúr,
(b) I gcás líon is lú ná seachtar stiúrthóir a bheith uirthi, beirt.
An Cathaoirleach ar bhord stiúrthóirí na Cuideachta.
9.—(1) Beidh cathaoirleach ar bhord stiúrthóirí na Cuideachta agus is ag an Aire (agus aigesean amháin) a cheapfar é ó am go ham, le toiliú an Aire Airgeadais.
(2) Beidh an cathaoirleach réamhráite i seilbh oifige go ceann cibé téarma agus ar cibé téarmaí agus coinníollacha (lena n-áirítear téarmaí agus coinníollacha maidir le sochair aoisliúntais) a chinnfidh an tAire ó am go ham, le toiliú an Aire Airgeadais.
(3) Féadfaidh an tAire, le toiliú an Aire Airgeadais, an cathaoirleach réamhráite a chur as oifig tráth ar bith.
Stiúrthóir bainistíochta na Cuideachta.
10.—(1) Féadfar stiúrthóir bainistíochta ar an gCuideachta, más cuí leis an Aire é, a cheapadh ó am go ham as na stiúrthóirí ag an Aire (agus aigesean amháin), le toiliú an Aire Airgeadais.
(2) Beidh stiúrthóir bainistíochta ar an gCuideachta i seilbh oifige go ceann cibé téarma agus ar cibé téarmaí agus coinníollacha (lena n-áirítear téarmaí agus coinníollacha maidir le sochair aoisliúntais) a chinnfidh an tAire, le toiliú an Aire Airgeadais.
(3) Féadfaidh an tAire, le toiliú an Aire Airgeadais, stiúrthóir bainistíochta ar an gCuideachta a chur as oifig tráth ar bith.
Oibleagáid chun cláir chomhardaithe, etc., a thabhairt don Aire.
11.—(1) Tabharfaidh an Chuideachta don Aire, a luaithe is féidir tar éis deireadh gach bliana cuntasaíochta—
(a) clár comhardaithe amhail mar a bhí i ndeireadh na bliana cuntasaíochta sin agus é arna iniúchadh go cuí ag iniúchóir na Cuideachta;
(b) cuntas sochair agus dochair don bhliain chuntasaíochta chéanna, agus é arna iniúchadh ar an gcuma chéanna;
(c) tuarascáil na stiúrthóirí do na scairshealbhóirí in aghaidh na bliana cuntasaíochta sin.
(2) Déanfaidh an tAire an clár comhardaithe, an cuntas sochair agus dochair agus an tuarascáil a thabharfar dó de bhun fho-alt (1) den alt seo a leagan faoi bhráid gach Tí den Oireachtas a luaithe is féidir tar éis an clár comhardaithe, an cuntas sochair agus dochair agus an tuarascáil sin a thabhairt dó amhlaidh.
(3) Tabharfaidh an Chuideachta don Aire, má iarrann an tAire uirthi é, cibé eolas a theastóidh uaidh maidir le haon chlár comhardaithe, cuntas sochair agus dochair nó tuarascáil, nó maidir le beartas agus oibríochtaí na Cuideachta.
Iniúchóir a cheapadh.
12.—Beidh ceapadh iniúchóra ag an gCuideachta don Chuideachta faoi réir fhormheas an Aire.
Stiúrthóirí, oifigigh agus seirbhísigh de chuid na Cuideachta agus comhaltas cheachtar Tí den Oireachtas.
13.—(1) Má ainmnítear stiúrthóir ar an gCuideachta mar iarrthóir i dtoghchán do cheachtar Teach den Oireachtas nó mar chomhalta de Sheanad Éireann, scoirfidh sé air sin de bheith ina stiúrthóir ar an gCuideachta.
(2) I gcás duine is oifigeach nó seirbhíseach i bhfostaíocht na Cuideachta a theacht chun bheith ina chomhalta de cheachtar Teach den Oireachtas—
(a) beidh sé, ar feadh na tréimhse dar tosach an dáta a thiocfaidh sé i dteideal, faoi Bhuan-Orduithe an Tí sin, suí sa Teach sin agus dar críoch an dáta a scoirfidh sé de bheith ina chomhalta den Teach sin nó, más rud é go dtarlódh sin roimhe sin, an dáta a éireoidh sé as an bhfostaíocht sin ag an gCuideachta nó a scoirfidh sé den fhostaíocht sin, ar iasacht ón bhfostaíocht sin.
(b) ní íocfaidh an Chuideachta leis, ná ní bheidh teideal aige chun go bhfaighidh sé ón gCuideachta, aon tuarastal nó pá, cibé acu é, i leith na tréimhse sin.
(3) I gcás duine atá nó a bhí ina oifigeach nó ina sheirbhíseach don Chuideachta a theacht i dteideal pinsin faoi na hAchtanna um Oifigí Aireachta agus Parlaiminte, 1938 to 1960, ní bheidh sé i dteideal an t-iomlán ná aon chuid dá thréimhse sheirbhíse inphinsin, de réir bhrí na nAchtanna sin, a áireamh le haghaidh aon sochar aoisliúntais is iníoctha faoi scéim arna déanamh ag an gCuideachta chun sochair aoisliúntais a íoc le hoifigigh nó seirbhísigh na Cuideachta nó ina leith.
(4) Aon duine a bheidh de thuras na huaire i dteideal, faoi Bhuan-Orduithe cheachtar Tí den Oireachtas, suí sa Teach sin, beidh sé, fad a bheidh sé i dteideal amhlaidh, dícháilithe chun teacht chun bheith ina stiúrthóir ar an gCuideachta nó ina oifigeach nó ina sheirbhíseach don Chuideachta.
Meabhrán agus airteagail chomhlachais na cuideachta a athrú.
14.—Déanfaidh an Chuideachta cibé bearta is gá faoi Acht na gCuideachtaí, 1963, chun meabhrán agus airteagail chomhlachais na Cuideachta a athrú ionas go mbeidh siad i gcomhréir leis an Acht seo.
Srian le meabhrán agus airteagail chomhlachais na Cuideachta a athrú. 1963, Uimh. 33.
15.—D'ainneoin aon ní in Acht na gCuideachtaí, 1963, nó i meabhrán nó airteagail chomhlachais na Cuideachta, ní bheidh athrú ar an meabhrán nó na hairteagail sin bailí ná éifeachtúil mura le formheas roimh ré ón Aire, arna thabhairt le toiliú an Aire Airgeadais, a dhéanfar é.
Caiteachas an Aire.
16.—Déanfar an caiteachas faoina rachaidh an tAire ag riaradh an Achta seo a íoc, a mhéid a cheadóidh an tAire Airgeadais é, as airgead a sholáthróidh an tOireachtas.
Gearrtheideal.
17.—Féadfar an tAcht um an British & Irish Steam Packet Company Limited (Fáil), 1965, a ghairm den Acht seo.
AN SCEIDEAL
COMHAONTÚ É SEO a rinneadh an Dara lá d'Fheabhra Míle naoi gcéad seasca a cúig IDIR COAST LINES LIMITED a bhfuil a n-oifig chláraithe i Reliance House Water Street Liverpool 2 (dá ngairtear “Coast Lines” anseo feasta) den chéad pháirt AIRE AIRGEADAIS Rialtas na hÉireann (dá ngairtear “an tAire Airgeadais” anseo feasta) den dara páirt agus AIRE IOMPAIR AGUS CUMHACHTA Rialtas na hÉireann (dá ngairtear “an tAire Iompair agus Cumhachta” anseo feasta) den tríú páirt
DE BHRÍ:—
(A) Gur corpraíodh an British & Irish Steam Packet Co. Limited (dá ngairtear “B & I” anseo feasta) an 22ú lá de Nollaig 1936 mar Chuideachta faoi theorainn Scaireanna faoi na Companies Acts, 1908 go 1917 agus ar a dháta seo go bhfuil ag an gCuideachta sin scairchaipiteal údaraithe £2,000,000 agus é roinnte i 2,000,000 Gnáthscair de £1 an ceann a bhfuil 1,600,000 Gnáthscair díobh eisithe agus láníoctha
(B) Gurb é Coast Lines úinéir tairbhiúil an 1,600,000 Gnáthscair eisithe sin
(C) Go bhfuil Coast Lines tar éis comhaontú an 1,600,000 Gnáthscair eisithe sin ar fad a dhíol agus an tAire Airgeadais (le haghaidh agus thar ceann Rialtas na hÉireann) tar éis comhaontú iad a cheannach faoi réir agus de réir na dtéarmaí agus na gcoinníollacha atá anseo ina dhiaidh seo
ANOIS FIANAÍTEAR LEIS AN gCOMHAONTÚ SEO AGUS COMHAONTAÍTEAR LEIS SEO mar a leanas:—
1. DÍOLFAIDH Coast Lines agus ceannóidh an tAire Airgeadais amhail ón lú lá d'Eanáir 1965 an 1,600,000 Gnáthscair eisithe sin ar fad saor ó gach lian muirear agus eire agus ó gach ceart codarsna agus faoi réir agus de réir na dtéarmaí agus na gcoinníollacha atá anseo ina dhiaidh seo
2. IS é praghas is iníoctha ag an Aire Airgeadais le Coast Lines ar na Scaireanna sin suim £3,606,922 (faoi réir an choinníll i gcónaí go gcomhlíonfaidh Coast Lines a oibleagáidí faoi Chlásal 4 (c) agus (d) thíos)
3. DÉANFAR an díol agus ceannach a chomhlánú an 15ú lá de Mhárta 1965 nó cibé dáta eile ar a gcomhaontóidh na páirtithe agus in áit ar a gcomhaontófar
4. AR an díol agus ceannach a bheith comhlánaithe:—
(a) ÍOCFAIDH an tAire Airgeadais an praghas a dúradh le Coast Lines faoi choinne iad seo a leanas a sheachadadh don Aire Airgeadais:—
(i) Aistrithe arna bhforghníomhú go cuí a chuimseoidh na Scaireanna go léir a gcomhaontaítear leis seo iad a dhíol i bhfabhar an Aire Airgeadais nó daoine a ainmneoidh an tAire Airgeadais maraon leis na Deimhnithe cinntitheacha a bhaineann leo
(ii) Aon chumhacht nó cumhachtaí aturnae ar dá bun nó dá mbun a forghníomhaíodh aon aistrithe den sórt sin
(b) Tabharfaidh Coast Lines chun críche go gceapfar ina Stiúrthóirí ar B & I cibé daoine a ainmneoidh an tAire Airgeadais (le comhaontú an Aire Iompair agus Cumhachta) agus go scoirfidh Stiúrthóirí uile B & I, seachas na stiúrthóirí a ainmneoidh an tAire Airgeadais (le comhaontú an Aire Iompair agus Cumhachta) mar atá ráite, láithreach gan chúiteamh d'oifig Stiúrthóra B & I agus go ligfidh uathu le héifeacht ó dháta an scortha sin a gcearta faoi seach faoi aon chomhaontú nó conradh fostaíochta de bhriathra béil nó i scríbhinn nó intuigthe le B & I
(c) Aisíocfaidh Coast Lines le B & I méid iomlán aon iasachta a bheidh an uair sin amuigh ag B & I ar Coast Lines agus dlite dó ó Coast Lines
(d) Ceannóidh Coast Lines ó B & I na sócmhainní sin le B & I a thuairiscítear sa Sceideal a ghabhann leis an gComhaontú seo (dá ngairtear “na Sócmhainní Eiscthe” anseo thíos) agus íocfaidh Coast Lines astu agus tabharfaidh na páirtithe sa Chomhaontú seo chun críche go ndéanfaidh B & I iad a dhíol le Coast Lines agus a aistriú chucu (nó de réir mar a ordóidh Coast Lines). Is é praghas a íocfaidh Coast Lines as na Sócmhainní Eiscthe suim £202,277
(e) Forghníomhóidh Coast Lines agus tabharfaidh na páirtithe sa Chomhaontú seo chun críche go bhforghníomhóidh B & I Comhaontú Gníomhaireachta i bhfoirm an dréachta ar ar comhaontaíodh cheana idir na páirtithe sa Chomhaontú seo agus ar cuireadh tús litreacha leis thar a gceann chun é a aithint (faoi réir aon leasuithe ar a gcomhaontófar go frithpháirteach)
5. TAR ÉIS díol agus ceannach an 1,600,000 Gnáthscair sin a bheith comhlánaithe leanfaidh B & I de ghníomhú mar ghníomhairí do na seirbhísí línéir leis an Coast Lines Group a ghabhann idir an Ríocht Aontaithe agus Poblacht na hÉireann agus tabharfaidh na páirtithe sa Chomhaontú seo chun críche go bhforghníomhóidh na páirtithe cuí comhaontuithe foirmiúla ar théarmaí a bheidh le réiteach maidir leis na gníomhaireachtaí sin
6. A luaithe is féidir tar éis díol agus ceannach an 1,600,000 Gnáthscair sin a bheith comhlánaithe tabharfaidh an tAire Airgeadais agus an tAire Iompair agus Cumhachta chun críche go ndéanfar cuntais B & I don bhliain dar críoch an 31 Nollaig 1964 a ullmhú agus a iniúchadh ag Stokes Bros. & Pim, Cuntasóirí Cairte, Iniúchóirí B & I faoi láthair; agus go ndéanfar na cuntais sin a ullmhú a mhéad is féidir é san fhoirm chéanna agus ar an mbonn céanna le cuntais iniúchta B & I don bhliain dar críoch 31 Nollaig 1963. Tabharfaidh an tAire Airgeadais agus an tAire Iompair agus Cumhachta chun críche a luaithe agus is féidir ina dhiaidh sin go ndearbhóidh agus go n-íocfaidh B & I díbhinn ar a scairchaipiteal faoi mar a bhí an 31 Nollaig 1964 agus go mbeidh méid iomlán na díbhinne sin (tar éis cáin a asbhaint) comhionann
(i) le méid iomlán an bhrabúis ar chuntas trádála B & I don bhliain dar críoch an 31 Nollaig 1964 agus na ndíbhinní (comhlána) a fuair B & I i leith na bliana sin ó infheistíochtaí trádála agus ó fhochuideachtaí
tar éis an méid seo a bhaint as
(ii) méid iomlán an dímheasa (de réir na rátaí céanna a úsáideadh i leith na bliana dar críoch an 31 Nollaig 1963) agus táillí Stiúrthóirí agus luach saothair iniúchóirí don bhliain dar críoch an 31 Nollaig 1964 agus cánachais ar bhrabúis na bliana sin agus aon ghannsoláthair i leith cánachais do bhlianta roimhe sin
mar a thaispeántar gach ní díobh sin sna cuntais iniúchta sin don bhliain sin. Ní fholóidh díol na Scaireanna sin a chomhaontaítear leis seo a dhiol an ceart chun an díbhinn sin a fháil agus coinneoidh Coast Lines í ach taobh amuigh de sin folóidh an díol sin gach ceart a ghabhann leis na Scaireanna sin faoi mar a bhí i dtosach gnó an lú lá d'Eanáir 1965
7. GO DTÍ go mbeidh díol agus ceannach an 1,600,000 Gnáthscair sin comhlánaithe tabharfaidh Coast Lines chun críche nach ndéanfaidh B & I aon scairchaipiteal breise a eisiúint ná a chur faoi rogha agus go ndéanfaidh sé gach dícheall chun a thabhairt chun críche go leanfaidh B & I dá ghnó a oibriú mar a bhí sé á oibriú go dtí seo
8. FAISNÉISEANN agus barántaíonn Coast Lines:—
(i) nach bhfuil srianadh ar bith air bheith páirteach sa Chomhaontú seo
(ii) go bhfuil gach maoin gníomhas ionstraim agus deimhniú is le B & I saor ó gach lian muirear agus eire mura bhfuil a leithéid curtha in iúl
DÁ FHIANÚ SIN rinneadh Gnáthshéala Coast Lines agus séalaí oifigiúla an Aire Airgeadais agus an Aire Iompair agus Cumhachta faoi seach a ghreamú den Chomhaontú seo
AN SCEIDEAL dá dtagraítear thuas
Na Sócmhainní Eiscthe
1. Scairchaipiteal eisithe iomlán Carrollstown Estates Limited arb é atá ann 75,000 Scair de £1 an ceann.
2. Scairchaipiteal eisithe iomlán Ernest Cullen & Sons Limited arb é atá ann 34,028 Scair “A” agus 5,972 Scair “B” iad uile ina scaireanna de £1 an ceann.
3. 9,000 Gnáthscair de £1 an ceann sa Liffey Dockyard Limited.
4. 250 Bintiúr Infhuascailte £1 a d'eisigh Cork Opera House Limited.
GREAMAÍODH GNÁTHSHÉALA COAST
LINES LIMITED de seo ina láthair seo:—
M. ARNET ROBINSON | |
Stiúrthóir | |
I.M. MacLAREN | |
Rúnaí |
I LÁTHAIR nuair a greamaíodh séala | |
oifigiúil an Aire Airgeadais de seo agus | |
a fíordheimhníodh é le síniú | |
|
|
T. K. WHITAKER | |
duine le húdarás séala an Aire sin a fhíordheimhniú: | |
T. K. WHITAKER |
Maureen Stuart, An Roinn Airgeadais, Baile Átha Cliath. Státseirbhíseach. | duine le húdarás faoi alt 15 (3) den Acht Airí agus Rúnaithe, 1924, séala an Aire Airgeadais a fhíordheimhniú |
I LÁTHAIR nuair a greamaíodh séala oifigiúil an Aire Iompair agus Cumhachta de seo agus a fíordheimhníodh é le síniú | |
|
|
T. J. Beere | |
duine le húdarás séala an Aire sin a fhíordheimhniú: |
I. Howard, | T. J. BEERE |
An Roinn Iompair agus Cumhachta, 23/28 Sráid Chill Dara, Baile Átha Cliath 2. Státseirbhíseach | duine le húdarás faoi Alt 15 (3) den Acht Airí agus Rúnaithe, 1924, séala an Aire Iompair agus Cumhachta a fhíordheimhniú. |